Salmoù 88 - Bibl Koad 21: Ar Bibl e Brezhoneg evit ar Vretoned

Salm 88

¹ D'ar mestr-kaner; kanaouenn; salm mibien Kora; war ar "Mahalad"; "Maskil" Heman an Ezrakiad.

² AOTROU, Doue va dieubidigezh, deiz ha noz e krian dirazout.

³ Ra yelo va fedenn dirazout, ro da skouarn da'm c'hriadennoù.

⁴ Rak va ene a zo leuniet a boanioù, ha va buhez a dosta ouzh lec'h ar marv.

⁵ Kontet on e-touez ar re a ziskenn er poull. Me a zo evel un den hep nerzh,

⁶ astennet e-touez ar re varv, evel ar re skoet d'ar marv, a zo gourvezet er bez, ar re na'c'h eus ken soñj anezho, hag a zo rannet eus da zorn.

⁷ Va lakaet ec'h eus er poull izelañ, el lec'hioù teñval, en donderioù.

⁸ Da fulor a bouez warnon, ha da holl goummoù a vec'hi ac'hanon.  Ehan

⁹ Pellaet ec'h eus diouzhin ar re a anavezan, va lakaet ec'h eus da vezañ evito un dra euzhus, serret on ha ne c'hellan mont kuit.

¹⁰ Va daoulagad a guzum dre ar glac'har, da c'hervel a ran bemdez, AOTROU! Astenn a ran va daouarn war-zu ennout.

¹¹ Hag e ri ur burzhud bennak evit ar re varv? Hag e savo ar re dremenet evit da veuliñ?  Ehan

¹² Hag e vo disklêriet da vadelezh er bez, ha da fealded en donder?

¹³ Hag e vo anavezet da vurzhudoù en deñvalijenn, ha da reizhder e douar an ankounac'h?

¹⁴ AOTROU, war-zu ennout e krian, va fedenn a ya dirazout adalek ar mintin.

¹⁵ AOTROU, perak e tistaolez kuit va ene? Perak e kuzhez da zremm diouzhin?

¹⁶ Me a zo glac'haret hag evel o vervel em yaouankiz. Bec'hiet on gant da spontoù, kollet on.

¹⁷ Da fulorioù o deus tremenet warnon, da spontoù am lazh.

¹⁸ Emaint tro-dro din evel doureier bemdez, va gronnañ a reont holl asambles.

¹⁹ Pellaet ec'h eus diouzhin mignoned ha kenvreudeur, an hini a anavezan eo an deñvalijenn.