Salmoù 83 - Bibl Koad 21: Ar Bibl e Brezhoneg evit ar Vretoned

Salm 83

¹ Kanaouenn; salm Azaf.

² O Doue, na chom ket sioul! Na vez ket bouzar ha na chom ket en diskuizh, o Doue!

³ Rak setu, da enebourien a gemmesk, ar re a gasa ac'hanout o deus savet o fenn.

⁴ Ober a reont a-enep da bobl iriennoù fall, hag e kuzuliont a-enep ar re a ziwallez.

⁵ Deuit, emezo, lakaomp anezho da vont da get a-douez ar pobloù, ha ra ne vo komzet ken eus anv Israel.

⁶ Rak kuzuliet o deus eus un hevelep kalon, graet o deus un emglev a-enep dit,

⁷ teltennoù Edom hag an Ismaeliz, Moab hag an Hagareniz,

⁸ Gebal, Ammon hag Amalek, ar Filistined gant tud Tir.

⁹ Ashur ivez en em unan ganto, prestañ a reont o divrec’h da vibien Lot.  Ehan

¹⁰ Gra dezho evel da Vadian, evel da Sisera, evel da Jabin e froud Kison,

¹¹ a voe distrujet en En-Dor, hag a servijas da deil d'an douar.

¹² Laka o friñsed da vezañ heñvel ouzh Oreb ha Zeeb, hag o holl rouaned ouzh Zebak ha Zalmuna.

¹³ Rak e lavaront: Tapomp evidomp chomlec'hioù Doue!

¹⁴ Va Doue, laka anezho heñvel ouzh an avel-dro, ouzh ar soul douget gant an avel,

¹⁵ ouzh an tan a lonk ar c'hoadeg, ouzh ar flamm a zev ar menezioù.

¹⁶ Evel-se red war o lerc'h gant da varr-amzer, spouron int gant da gorventenn,

¹⁷ leugn o dremmoù a vezh, ha ma klaskint da anv, o AOTROU!

¹⁸ Ra vint mezhus, ra vint spontet da viken, ra vint rentet pinous ha ma'z aint da get!

¹⁹ Ra ouezint ez eo te hepken a zo anvet an AOTROU, te eo mestr an douar holl.