Salmoù 81 - Bibl Koad 21: Ar Bibl e Brezhoneg evit ar Vretoned

Salm 81

¹ D'ar mestr-kaner; salm Azaf; war "Gittid".

² Kanit gant levenez da Zoue, hon nerzh! Laoskit kriadennoù a joausted da Zoue Jakob!

³ Kanit ar ganaouenn, lakait da zasseniñ an daboulinig, an delenn dudius hag al lourenn!

⁴ Sonit gant ar shofar evit al loar nevez, evit al loargann, evit deiz hor gouel!

⁵ Rak ul lezenn eo evit Israel, un urzh a-berzh Doue Jakob.

⁶ Ober a reas a gement-se ur reolenn evit Jozef, pa yeas er-maez a-enep bro Ejipt. Eno e klevis ur yezh n’anavezen ket.

⁷ Divec’hiet em eus diouzh ar bec’h e skoaz, e zaouarn o deus laosket ar baner.

⁸ Kriet ec’h eus en estrenvan hag em eus da zieubet. Respontet em eus dit, da guzhet er c’hurun, da amprouet en doureier Meriba.  Ehan

⁹ Selaou, va fobl, ha da aliañ a rin, o Israel, ma selaoufes ouzhin!

¹⁰ Ra ne vo ket a zoueoù estren ez ti. Ra ne stoui ket dirak doueoù ar broadoù.

¹¹ Me eo an AOTROU da Zoue, am eus da lakaet da bignat eus bro Ejipt. Digor da c’henoù hag e leuniañ a rin.

¹² Met va fobl n’he deus ket selaouet ouzh va mouezh, Israel n’eo ket fellet dezhañ sentiñ ouzhin.

¹³ Hag em eus o lezet e kaleter o c’halon, da gerzhout hervez o c’huzulioù.

¹⁴ O! Mar plijfe da’m fobl selaou ac’hanon, ma kerzfe Israel em hentoù,

¹⁵ en un taol e lakafen o enebourien da blegañ, e trofen va dorn a-enep o enebourien.

¹⁶ Ar re a gasa an AOTROU o defe pleget dezhañ, hag amzer Israel a badfe da viken.

¹⁷ Doue en defe o maget gant mel ar gwinizh. Da leuniet em befe eus mel ar roc’h.