Salmoù 80 - Bibl Koad 21: Ar Bibl e Brezhoneg evit ar Vretoned

Salm 80

¹ D'ar mestr-kaner; salm Azaf; war "Shoshanim-Edud".

² Mêsaer Israel, ro da skouarn. Te hag a ren Jozef evel un tropell, te hag a azez etre ar Cherubined, laka da splannder da lugerniñ.

³ Dirak Efraim, Benjamin ha Manase, dihun da c'halloud, deus d'hon saveteiñ.

⁴ O Doue, adsav ac'hanomp! Laka da zremm da lugerniñ, hag e vimp salvet.

⁵ AOTROU, Doue an armeoù, betek pegoulz e vogedo da gounnar a-enep pedenn da bobl?

⁶ Ober a rez dezho debriñ ur bara a zaeroù, hag evañ daeroù dreist muzul.

⁷ Ober a rez ac'hanomp un abeg a enebiezh d'hon amezeien, hag hon enebourien a ra goap ouzhimp etrezo.

⁸ Doue an armeoù, adsav ac'hanomp! Ra da'z tremm lugerniñ hag e vimp salvet!

⁹ Tennet ec'h eus ur winienn eus an Ejipt, kaset ec'h eus kuit broadoù hag ec'h eus he flantet,

¹⁰ aozet ec'h eus al lec'h dirazi, gwrizioù he deus graet ha leuniet an douar.

¹¹ Ar menezioù en em c'holoe eus he skeud, ha gwez-sedrez Doue eus he skourroù.

¹² Astenn a rae he brankoù betek ar mor, hag he broustennoù betek ar stêr.

¹³ Perak ec'h eus torret he c'hleuzioù, en doare ma'z eo skrapet gant an holl re a dremen,

¹⁴ ma'z eo distrujet gant moc'h-gouez ar goadeg, peuret gant loened ar parkeier?

¹⁵ Doue an armeoù, deus en-dro! Sell eus an neñvoù, gwel hag evesha ouzh ar winienn-mañ.

¹⁶ Diwall ar pezh en deus da du dehou plantet, hag ar mab ac'h eus dibabet.

¹⁷ Devet eo ha troc'het eo. Mervel a reont dirak fulor da zremm.

¹⁸ Ra vo da zorn war den da du dehou, war mab an den ac'h eus dibabet,

¹⁹ ha ne zistroimp ken diouzhit. Ro deomp ar vuhez, hag ec'h aspedimp da anv.

²⁰ AOTROU, Doue an armeoù, adsav ac'hanomp! Laka da zremm da lugerniñ hag e vimp salvet!