Salmoù 77 - Bibl Koad 21: Ar Bibl e Brezhoneg evit ar Vretoned

Salm 77

¹ D'ar mestr-kaner; hervez "Jedutun"; salm Azaf.

² Va mouezh a sav da Zoue hag e krian. Va mouezh a sav da Zoue hag e selaouo ac'hanon.

³ En deiz va estrenvan, em eus klasket an Aotrou. E-pad an noz, va dorn a oa astennet etrezek ennañ ha ne skuizhe ket. Va ene ne felle ket dezhañ bezañ frealzet.

⁴ Soñj em boa eus Doue hag e huanaden. Prederiañ a raen ha va spered a oa dinerzh.  Ehan

⁵ Dalc'het ez poa va daoulagad digor er beilhadennoù. Trubuilhet e oan ha ne c'hellen ket komz.

⁶ Soñjal a raen en deizioù a wechall, e bloavezhioù an amzer dremenet.

⁷ Soñj am boa eus va hesoniezh noz, prederiañ a raen em c'halon, ha va spered a eveshae.

⁸ An AOTROU, ha teurel a raio kuit da viken? Ha ne vo ken madelezhus?

⁹ E vadelezh, ha paouezet he deus da viken? E c'her, hag echu eo betek an holl oadoù?

¹⁰ Doue, hag ankounac'haet en deus kaout trugarez? Ha bez' en deus en e gounnar serret e drugarez?

¹¹ Lavaret em eus: Setu aze ar pezh a ra va foan: tu dehou an Uhel-Meurbet a zo kemmet.

¹² Soñj am bo eus oberennoù an AOTROU, oc'h eñvoriñ da vurzhudoù a wechall.

¹³ Prederiañ a rin war da holl oberennoù, hag ec'h eveshain ouzh da oberoù bras.

¹⁴ O Doue, da hentoù a zo santel! Pehini eo an doue all a zo bras evel Doue?

¹⁵ Te eo an Doue a ra burzhudoù. Roet ec'h eus da anavezout da nerzh e-touez ar pobloù.

¹⁶ Gant da vrec'h ec'h eus dasprenet da bobl, mibien Jakob ha Jozef.  Ehan

¹⁷ An doureier a welas ac'hanout, o Doue! An doureier a welas ac'hanout, krenañ a rejont. An donderioù zoken a spontas.

¹⁸ Ar c'hoabr en em skuilhas en doureier, ar c'houmoul a gurunas, da viroù ivez a nijas a bep tu.

¹⁹ Da gurunoù a grozas er gorventenn, al luc'hed a skedas war ar bed, an douar a spontas hag a grenas.

²⁰ Graet ec'h eus da hent er mor, da wenodennoù en doureier bras, ha da roudoù n'int ket bet anavezet.

²¹ Renet ec'h eus da bobl evel un tropell, dre zorn Moizez hag Aaron.