Salmoù 76 - Bibl Koad 21: Ar Bibl e Brezhoneg evit ar Vretoned

Salm 76

¹ D'ar mestr-kaner; salm Azaf; kanaouenn gant binvioù-kerdin.

² Doue a zo anavezet e Juda, e anv a zo bras en Israel.

³ E Salem emañ e deltenn, e Sion emañ e chomlec'h.

⁴ Eno eo en deus torret foeltr ar wareg, ar skoed, ar c'hleze hag an emgann.  Ehan

⁵ Te a zo lugernus ha leun a splannder, muioc'h eget menezioù al laeron.

⁶ Diwisket int bet, an dud a galon greñv, bez' e oant o kousket, hag an holl dud nerzhus-se n'o deus ken kavet o daouarn.

⁷ Da'z kourdrouz, Doue Jakob, kirri ha kezeg a zo bet skoet a vorgousk.

⁸ Te a zo burzhudus, piv a c'hell padout dirazout adalek ma en em ziskouez da gounnar?

⁹ Pa embannez da varnedigezh eus an neñvoù, an douar a zo spouronet hag en em zalc'h sioul,

¹⁰ pa savez, o Doue, evit barn, evit dieubiñ holl ezhommeien an douar.  Ehan

¹¹ A-dra-sur, fulor an den a dro da'z meuleudi, pa wiskez da gounnar.

¹² Grit gouestloù hag o sevenit d'an AOTROU ho Toue. Ra zegaso an holl re a zo en-dro dezhañ profoù d'an Hini burzhudus.

¹³ Diskar a ra lorc'hentez ar briñsed, spouronus eo evit rouaned an douar.