Salmoù 73 - Bibl Koad 21: Ar Bibl e Brezhoneg evit ar Vretoned

Salm 73

¹ Salm Azaf. Ya, Doue a zo mat evit Israel, evit ar re a zo glan o c'halon.

² Evidon, war-bouez nebeud en deus manket va zroad, ha war-bouez nebeud o deus strebotet va c'hammedoù,

³ rak on bet avius ouzh ar re ziskiant, o welout berzh ar re zrouk.

⁴ N'int ket ereet betek o marv, o nerzh a zo en e leunder.

⁵ Pa vez ar re varvus en poan, int ne vezont ket. N'int ket tizhet gant an dud.

⁶ Setu perak al lorc'h a ra an dro dezho evel ur gelc'henn, hag an taerder o golo evel ur gwiskamant.

⁷ O daoulagad a zo c'hwezet gant al lard. Gwelout a reer c'hoantoù o c'halon.

⁸ Goapaerien int hag e komzont gant drougiezh eus gwaskerezh. Komz a reont gant rogentez.

⁹ Kas a reont o genoù betek an neñv, hag o zeod a red an douar.

¹⁰ Neuze e bobl a zistro daveto, pa o deus da evañ dour c'hrerv gant fonnusted,

¹¹ hag e lavaront: Penaos e oufe Doue? Ha penaos en defe anaoudegezh an Uhel-Meurbet?

¹² Setu, ar re-se a zo drouk, hag atav eürus, e tastumont pinvidigezhioù.

¹³ A-dra-sur en aner eo em eus naetaet va c'halon, hag em eus gwalc'het va daouarn en dinammded,

¹⁴ rak skoet on bemdez, va c'hastiz a zistro bep mintin.

¹⁵ Ma em bije lavaret: Me a gomzo evelto, setu e vijen disleal da ouenn da vibien.

¹⁶ Neuze em eus prederiet evit kompren an traoù-se. Me am eus kavet din diaes kement-se,

¹⁷ betek ma'z on aet e santual Doue, ha ma em eus taolet evezh ouzh diwezh an dud-se.

¹⁸ Rak o lakaez e lec'hioù risklus, hag e rez dezho kouezhañ e poulloù.

¹⁹ Setu, distrujet int a-daol-trumm, lamet ha kuzumet dre un termen buan.

²⁰ Evel un huñvre pa zihuner, evel-se, AOTROU, pa zihunez e lakaez en dispriz o skeudenn aner.

²¹ Pa c'hlac'hare evel-se va c'halon, pa en em drubuilhen va-unan,

²² neuze e oan diboell hag hep anaoudegezh, bez' e oan dirazout evel loened.

²³ Met me a vo dalc'hmat ganit, va c'hemeret ec'h eus dre va dorn dehou,

²⁴ va ren a ri dre da guzul, ha neuze em degemeri er gloar.

²⁵ Piv all am eus en neñv nemedout? Ne gavan plijadur nemet ennout war an douar.

²⁶ Va c'hig ha va c'halon a zo dinerzh, met Doue eo roc'h va c'halon ha va lod da viken.

²⁷ Rak setu, ar re a bella diouzhit a varvo. Lemel a ri kuit an holl re a zistroio diouzhit.

²⁸ Met evidon, tostaat ouzh Doue eo va mad. Lakaet em eus va repu en Aotrou, an AOTROU, evit disklêriañ da holl oberennoù.