Salmoù 72 - Bibl Koad 21: Ar Bibl e Brezhoneg evit ar Vretoned

Salm 72

¹ Eus Salomon. O Doue, ro da varnedigezhioù d'ar roue, ha da reizhder da vab ar roue!

² Ra varno da bobl gant reizhder ha da ezhommeien gant eeunder.

³ Ar menezioù hag an torgennoù a roio ar berzh d'ar bobl, dre an ober eus da reizhder.

⁴ Reiñ a raio o gwir d'an ezhommeien eus ar bobl, saveteiñ a raio bugale ar paour, hag e flastro ar gwasker.

⁵ Da zoujañ a reor e-keit ha ma pado an heol hag al loar, a oad da oad.

⁶ Bez' e vo evel ur glav o kouezhañ war an azfoenn, evel ur glav fin o tourañ an douar.

⁷ En e zeizioù e vleunio an den reizh, hag e vo ur fonnusted a beoc'h, betek ma ne vo ken al loar.

⁸ Ren a raio eus ur mor d'egile, hag adalek ar stêr betek pennoù an douar.

⁹ Tud ar gouelec'h a blego dirazañ, e enebourien a lipo ar poultr.

¹⁰ Rouaned Tarsiz hag an inizi a ginnigo dezhañ donezonoù. Rouaned Seba ha Saba a zegaso dezhañ profoù.

¹¹ An holl rouaned a stouo dirazañ, an holl bobloù a servijo anezhañ.

¹² Rak dieubiñ a raio ar paour o c'harmiñ hag an ezhommeg hep sikour.

¹³ Truez en devo ouzh an hini gwalleürus hag ouzh ar paour, saveteiñ a raio eneoù ar beorien.

¹⁴ Dasprenañ a raio o ene eus ar waskerezh hag eus an taerder, hag o gwad a vo prizius dirak e zaoulagad.

¹⁵ Bevañ a raio hag e vo roet dezhañ aour Seba. Hep paouez e pedor evitañ ha bemdez e vo benniget.

¹⁶ Ar gwinizh a fonno er vro, war lein a menezioù. E frouezh a drouzo evel al Liban. Ar bobl a vleunio er c'hêrioù evel geot an douar.

¹⁷ E anv a chomo da viken. E anv a vo embannet e-keit ha ma lugerno an heol. Dre e anv e vior benniget. Galvet e vo eürus gant an holl vroadoù.

¹⁸ Benniget ra vo an AOTROU Doue, Doue Israel, an hini hepken a ra traoù burzhudus.

¹⁹ Benniget ra vo da viken e anv glorius, ra vo an douar holl leuniet gant e c'hloar! Amen! Amen!

²⁰ Echu eo pedennoù David, mab Jese.