Salmoù 71 - Bibl Koad 21: Ar Bibl e Brezhoneg evit ar Vretoned

Salm 71

¹ AOTROU en em dennet on da'z kavout, ra ne vin ket mezhek, biken!

² Va dieub dre da reizhder ha va laka da dec'hout! Stou da skouarn war-zu ennon ha va savete!

³ Bez evidon ur roc'h a vodenn, e-lec’h ma c'hellin atav en em denn. Urzhiet ec'h eus ma vefen salvet, rak te eo va roc'h ha va c'hreñvlec'h.

⁴ Va Doue, va dieub eus dorn an den fall, eus dorn an den drouk hag ar gwasker.

⁵ Rak te eo va esperañs, Aotrou AOTROU, va fiziañs adalek va yaouankiz.

⁶ En em harpet on warnout adalek va ganedigezh. Te eo an hini am zennas eus kof va mamm, te eo va meuleudi e pep amzer.

⁷ Bet on evel ur burzhud dirak daoulagad kalz, met te eo va bodenn greñv.

⁸ Ra vo va genoù leuniet eus da veuleudi ha da c'hloar bemdez!

⁹ Na'm zaol ket kuit en amzer ar gozhni, pa'z a va nerzh kuit, na'm dilez ket,

¹⁰ rak va enebourien a gomz ac'hanon, ar re a spi va ene en em guzuilh asambles,

¹¹ o lavarout: Doue en deus e zilezet, redit war e lerc'h ha tapit anezhañ, rak n'eus den d'e zieubiñ.

¹² O Doue, na bella ket diouzhin! Va Doue, hast dont da'm sikour!

¹³ Ra vo enebourien va ene goloet a zismegañs hag a vezh. Ra vo mezhek ar re a fell dezho va c'holl, ha ra varvint.

¹⁴ Met me a espero atav, hag e veulin ac'hanout muioc'h-muiañ.

¹⁵ Va genoù a embanno bemdez da reizhder ha da zieubidigezhioù, rak n'anavezan ket an niver anezho.

¹⁶ Mont a rin en ur veuliñ da oberennoù bras Aotrou AOTROU. Brudañ a rin da reizhder hepken.

¹⁷ O Doue! Va c'helennet ec'h eus adalek va yaouankiz, ha betek vremañ em eus embannet da vurzhudoù.

¹⁸ Zoken betek ar gozhni, betek ar gozhni wenn, o Doue, na'm dilez ket, ken na'm bo embannet nerzh da vrec'h d'ar rummad-mañ, da c'halloud d'an holl re a vo ganet,

¹⁹ ha da reizhder savet uhel, o Doue! Ober a rez traoù bras, o Doue, piv a zo heñvel ouzhit?

²⁰ Va lakaet ec'h eus da welout meur a estrenvan ha meur a boan, hag e tistroez da reiñ ar vuhez din, ha va lakaez da bignat er-maez eus donderioù an douar.

²¹ Kreskiñ a ri va braster, hag e frealzi ac'hanon adarre.

²² Hag e veulin ac'hanout war ar lud evit da fealded, o va Doue! Kanañ a rin evidout war an delenn, o Sant Israel!

²³ Va muzelloù ha va ene ac'h eus dasprenet a gano gant levenez pa veulin ac'hanout.

²⁴ Va zeod ivez a adlavaro da reizhder bemdez, rak ar re a glask va gwalleur a vo mezhek hag a ruzio.