Salmoù 66 - Bibl Koad 21: Ar Bibl e Brezhoneg evit ar Vretoned

Salm 66

¹ Kanaouenn; salm; d'ar mestr-kaner. Laoskit kriadennoù a levenez da Zoue, c'hwi holl dud an douar!

² Kanit gloar e anv, meulit anezhañ, roit dezhañ gloar.

³ Lavarit da Zoue: Pegen burzhudus eo da oberennoù! En abeg da vraster da nerzh, da enebourien a zeuio da blegañ dirazout.

⁴ An douar holl a stouo dirazout, kanañ a raio da'z enor, kanañ a raio da'z anv.  Ehan

⁵ Deuit ha gwelit oberennoù Doue. Burzhudus eo er pezh a ra e-keñver mibien an dud.

⁶ Cheñchet en deus ar mor en douar sec'h. Treuzet hon eus ar stêr war droad. Eno omp laouenaet ennañ.

⁷ Ren a ra da viken dre e c'halloud, e zaoulagad a evesha ouzh ar broadoù, evit na savo ket ar re zisuj.  Ehan

⁸ Pobloù, bennigit hon Doue, roit da glevout ho mouezh dre veuleudioù evitañ,

⁹ eñ hag en deus miret ar vuhez d'hon ene, ha n'en deus ket lezet hon treid da gouezhañ.

¹⁰ Rak hon amprouet ec'h eus, o Doue! Lakaet ec'h eus ac'hanomp da dremen dre an teuzlestr evel an arc'hant.

¹¹ Hon degaset ez poa er roued, lakaet war hon divgroazell ur bec'h pounner,

¹² lakaet ez poa tud da bignat war hor pennoù, aet e oamp en tan hag en dour, met hol lakaet ec'h eus er frankiz hag er fonnusted.

¹³ Mont a rin ez ti gant loskaberzhoù, hag e sevenin va gouestloù,

¹⁴ o deus lavaret va muzelloù, hag en deus disklêriet va genoù en estrenvan.

¹⁵ Kinnig a rin dit deñved lart da loskaberzhoù, gant meot mogedus war an aoter. Hag ec'h aberzhiñ ejened gant bouc'hed.  Ehan

¹⁶ C'hwi holl hag a zouj Doue, deuit, selaouit, hag e tisklêrin ar pezh en deus graet da'm ene.

¹⁷ Me am eus e aspedet eus va genoù, evel-se va zeod ivez en meulo.

¹⁸ Mar em befe soñjet ur fallentez bennak em c'halon, an Aotrou n'en dije ket va selaouet.

¹⁹ Met a-dra-sur Doue en deus va selaouet, roet en deus ar skouarn da vouezh va fedenn.

²⁰ Benniget ra vo Doue, n'en deus ket taolet kuit va fedenn, na tennet e vadelezh diganin.