Salmoù 65 - Bibl Koad 21: Ar Bibl e Brezhoneg evit ar Vretoned

Salm 65

¹ D'ar mestr-kaner; salm David; kanaouenn.

² O Doue! Ar veuleudi a c'hortoz ac'hanout e Sion, eno e vo sevenet ar gouestloù graet dit.

³ O te hag a glev ar bedenn! Pep krouadur a zeuio betek ennout.

⁴ An direizhder en doa trec'het warnon, met te a bardono hon disentidigezh.

⁵ Eürus an hini a zibabez hag a lakaez da chom en da leurioù! Leuniet e vimp eus madoù da di, eus santelezh da balez.

⁶ Respont a ri deomp dre vurzhudoù, hervez da reizhder, o Doue hor silvidigezh, esperañs pennoù pellañ an douar hag ar mor!

⁷ Derc'hel a ra start ar menezioù dre e nerzh, gourizet eo a c'halloud.

⁸ Sioulaat a ra trouz ar morioù, trouz o c'hoummoù ha ragach ar pobloù.

⁹ Hag ar re a zo o chom e pennoù an douar a zouj dirak da vurzhudoù. Lakaat a rez da ganañ gant levenez ar sav-heol hag ar c'huzh-heol.

¹⁰ Gweladenniñ a rez an douar, e zourañ a rez, e binvidikaat gant fonnusted. Gwazhioù Doue a zo leun a zour, kempenn a rez o gwinizh, goude ma ec'h eus evel-se kempennet an douar.

¹¹ Dourañ a rez e irvi hag e plaenaez e vouded, e wakaat a rez gant glav fin hag e vennigez e ziwan.

¹² Kuruniñ a rez ar bloaz gant da vadoù, ha rodoù da garr a laosk ar fonnusted.

¹³ He skuilhañ a reont war beurvanoù ar gouelec'h, hag an torgennoù a zo gwisket a levenez.

¹⁴ Ar maezioù a zo goloet a dropelloù, hag an traoniennoù a zo leun a winizh. Tridal a reont a gement-se hag e kanont.