Salmoù 64 - Bibl Koad 21: Ar Bibl e Brezhoneg evit ar Vretoned

Salm 64

¹ D'ar mestr-kaner; salm David.

² O Doue! Selaou va mouezh pa gomzan, diwall va buhez diouzh an enebour am spouron.

³ Va gwarez diouzh irienn ar re zrouk, diouzh tousmac'h ar vicherourien a zireizhder,

⁴ a lemm o zeod evel ur c'hleze, a gempenn o c'homz c'hwerv evel ur bir,

⁵ evit tennañ dre guzh war an den didamall. Tennañ a reont a daol-trumm a-enep dezhañ, ha n'o deus ket a zoujañs.

⁶ Startaat a reont en ur c'hoant fall. Ne gomzont nemet eus kuzhat stignoù, hag e lavaront: Piv en gwelo?

⁷ Ijinañ a reont faosoni: Setu, ni a zo prest, ar raktres a zo graet! Ya, e diabarzh an den, kalon pep hini a zo un donder.

⁸ Met Doue a daol outo ur bir. A daol-trumm ez int skoet.

⁹ Kouezhañ a reont dre o zeodoù o-unan. An holl re a wel anezho a hej o fenn.

¹⁰ An dud a zo holl leuniet a zoujañs, disklêriañ a reont oberennoù Doue, hag ec'h eveshaont ouzh ar pezh en deus graet.

¹¹ An den reizh a laouenaio en AOTROU hag en em denno etrezek ennañ. An holl re o deus ar galon eeun, a gavo gloar a gement-se.