Salmoù 62 - Bibl Koad 21: Ar Bibl e Brezhoneg evit ar Vretoned

Salm 62

¹ D'ar mestr-kaner; hervez "Jedutun"; salm David.

² Va ene en em harp war Doue hepken, anezhañ eo e teu va silvidigezh.

³ Eñ hepken eo va roc'h, va dieubidigezh, va repu uhel. Ne vin ket kalz brañsellet.

⁴ Betek pegoulz en em daolot war un den, evit e zistrujañ holl asambles, evel ur voger gosteziet, evel ur c'hleuz brañsellet?

⁵ Ne reont nemet irienniñ evit e lakaat da gouezhañ eus e uhelenn. En em blijout a reont er gaou. Gant o genoù e vennigont, met gant o c'halon e villigont.  Ehan

⁶ Va ene, diskuizh e Doue hepken, rak va gortoz a zo ennañ.

⁷ Eñ hepken eo va roc'h, va dieubidigezh, va repu uhel. Ne vin ket brañsellet.

⁸ E Doue emañ va silvidigezh ha va gloar. Va roc'h nerzhus, va skoazell a zo e Doue.

⁹ Pobloù, fiziit ennañ e pep amzer, digorit ho kalonoù dirazañ. Doue eo hor repu.  Ehan

¹⁰ Ar re vihan n'int nemet netra, ar re vras n'int nemet gaou. Lakaet er valañs, e vefent holl asambles skañvoc'h eget an netra zoken.

¹¹ Na fiziit ket en taerder, ha na vezit ket touellet gant al laeroñsi. Mar kresk ar binvidigezh, na lakait ket enni ho kalon.

¹² Doue en deus komzet ur wech, ha me am eus e glevet div wech: rak an nerzh a zo da Zoue.

¹³ Dit-te ivez, Aotrou, an drugarez! Ya, te a roio en-dro da bep hini hervez e oberennoù.