Salmoù 59 - Bibl Koad 21: Ar Bibl e Brezhoneg evit ar Vretoned

Salm 59

¹ D'ar mestr-kaner; "Miktam" David; war "Al-Tashed". Pa gasas Saül da eveshaat ouzh e di evit e lazhañ.

² Va Doue, va dieub eus va enebourien, va diwall eus ar re a sav a-enep din.

³ Va dieub eus ar vicherourien a zireizhder, ha va savete eus an dud wadsec'hedik.

⁴ Rak setu, emaint war-c'hed evit lemel va buhez diganin. Tud galloudek a sav em enep, hep ma vefe dismegañs ennon, na drougiezh, o AOTROU!

⁵ Hep ma vefe fallentez ennon, e redont hag en em gempennont. Dihun da zont da'm sikour ha sell.

⁶ Te eta, AOTROU, Doue an armeoù, Doue Israel, dihun da weladenniñ an holl vroadoù. Na ra trugarez da hini ebet eus an dud fall ha drouk.  Ehan

⁷ Distreiñ a reont d'an abardaez en ur yudal evel chas, hag o redek kêr.

⁸ Setu e c'hwezhont kunujennoù eus o genoù, klezeier a zo war o muzelloù, rak e lavaront: Piv a glev?

⁹ Met te, AOTROU, te a c'hoarzho outo, te a raio goap eus an holl bobloù.

¹⁰ En abeg d'o nerzh, ouzhit-te eo e sellan, rak Doue eo va repu uhel.

¹¹ Va Doue, en e vadelezh, am diaraogo. Doue a lakaio ac'hanon da welout gant levenez va enebourien.

¹² Na lazh ket anezho, gant aon na ankounac’hafe va fobl. Kemmesk anezho dre da c'halloud ha stlap anezho d'an traoñ, o Aotrou hor skoed.

¹³ Pep komz eus o muzelloù a zo ur pec'hed eus o genoù. Ra vint eta tapet en o lorc'h, en abeg d'an droukpedennoù ha d'ar gevier a lavaront.

¹⁴ Kuzum anezho gant fulor, kuzum anezho ha ra na vint ken. Ra vo anavezet emañ Doue o ren war Jakob betek pennoù ar bed.  Ehan

¹⁵ Ra zistroint d'an abardaez en ur yudal evel chas, hag o redek kêr.

¹⁶ Ra ez aint aze hag amañ o klask debriñ, ha ra dremenint an noz hep bezañ leuniet.

¹⁷ Met me a gano da nerzh. Adalek ar beure e veulin da vadelezh, rak out bet va repu uhel ha va bodenn en deiz an estrenvan.

¹⁸ Te, va nerh, me az meulo. Rak Doue eo va repu uhel, an Doue am laka da welout e vadelezh.