Salmoù 51 - Bibl Koad 21: Ar Bibl e Brezhoneg evit ar Vretoned

Salm 51

¹ D'ar mestr-kaner; salm David.

² Pa zeuas Natan ar profed d'e gavout, goude ma voe aet David war-zu Bat-Sheba.

³ O Doue! Az pez truez ouzhin hervez da drugarez. Hervez braster da garantez, dilam va disentidigezh,

⁴ va gwalc'h da vat eus va direizhder, ha va glana eus va fec'hed,

⁵ rak anavezout a ran va disentidigezh, ha va fec'hed a zo dirazon dalc'hmat.

⁶ Pec'het em eus a-enep dit, a-enep dit-te da-unan, hag em eus graet ar pezh a zo fall dirak da zaoulagad, en doare ma vi reizh pa gomzi, didamall pa varni.

⁷ Setu, en direizhder ez on bet stummet, ha va mamm he deus va c'hoñsevet er pec'hed.

⁸ Setu, e karez ar wirionez er galon, hag ec'h eus roet din da anavezout ar furnez e-barzh ennon.

⁹ Va glana eus va fec'hed gant ar sikadez hag e vin naet, va gwalc'h hag e vin gwennoc'h eget an erc'h.

¹⁰ Va laka da glevout al levenez hag ar joa, ma laouenaio an eskern ac'h eus bruzunet.

¹¹ Distro da zremm diouzh va fec'hedoù, diverk va direizhder.

¹² O Doue! Krou ennon ur galon c'hlan, nevesa em diabarzh ur spered eeun,

¹³ na'm daol ket pell diouzh da zremm, ha na lam ket da Spered-Santel diganin.

¹⁴ Ro din en-dro levenez da silvidigezh, ha ra harpo ac'hanon ur spered a youl vat.

¹⁵ Kelenn a rin da hentoù d'ar re zisent, hag ar bec'herien a zistroio ouzhit.

¹⁶ Va dieub eus ar gwad skuilhet, o Doue, Doue va silvidigezh! Va zeod a gano kreñv da reizhder.

¹⁷ Aotrou, digor va muzelloù, ha va genoù a embanno da veuleudi.

¹⁸ Rak ne gavez ket plijadur en aberzhoù, anez e rofen dit. Met al loskaberzhoù ne blijont ket dit.

¹⁹ An aberzhoù a blij da Zoue eo ur spered bruzunet. O Doue! Ne zisprizez ket ur galon bruzunet ha keuziek.

²⁰ Gra vad da Sion ez madelezh, sav mogerioù Jeruzalem.

²¹ Neuze e kavi plijadur en aberzhoù a reizhder, el loskaberzhoù hag en holl brofadennoù, neuze e vo kinniget dit koleoù yaouank war da aoter.