Salmoù 47 - Bibl Koad 21: Ar Bibl e Brezhoneg evit ar Vretoned

Salm 47

¹ D'ar mestr-kaner; salm mibien Kora.

² C'hwi, pobloù, stlakit holl ho taouarn! Laoskit kriadennoù a levenez da Zoue, gant ur vouezh drant!

³ Rak an AOTROU eo an Uhel-Meurbet, ar spouronus, ar roue meur war an douar holl.

⁴ Renkañ a ra ar pobloù dindanomp, hag ar broadoù dindan hon treid.

⁵ Dibab a ra deomp hon hêrezh, gloar Jakob a zo karet gantañ.  Ehan

⁶ Doue a zo pignet e-kreiz kriadennoù a levenez, an AOTROU a zo pignet e-kreiz son ar shofar.

⁷ Kanit da Zoue, kanit! Kanit d'hor roue, kanit!

⁸ Rak Doue eo roue an douar holl. Kanit ar c'hantik!

⁹ Doue a ren war ar broadoù, Doue a zo azezet war e dron santel.

¹⁰ Priñsed ar pobloù en em vod gant pobl Doue Abraham, rak da Zoue eo skoedoù an douar. Uhel-meurbet eo savet.