Salmoù 46 - Bibl Koad 21: Ar Bibl e Brezhoneg evit ar Vretoned

Salm 46

¹ D'ar mestr-kaner; kanaouenn mibien Kora; war "Alamod".

² Doue eo hor repu hag hon nerzh, ur skoazell en estrenvan, aezet bras da gavout.

³ Setu perak n'hor bo ket aon pa vefe kemmesket an douar, pa vefe brañsellet ar menezioù e-kreiz ar mor,

⁴ pa yudfe e zoureier en ur voubouilhat, ha pa lakafe o fulor ar menezioù da grenañ.  Ehan

⁵ Ur stêr hag he gwazhioù a laouena kêr Doue, lec'h santel chomlec'h an Uhel-Meurbet.

⁶ Emañ Doue en he c'hreiz ha ne vo ket brañsellet. Doue a ro sikour dezhi adalek distro ar mintin.

⁷ Ar pobloù a fiñv, ar rouantelezhioù a vrañsell, lakaat a ra e vouezh da vezañ klevet, hag an douar a deuz.

⁸ AOTROU an armeoù a zo ganeomp, Doue Jakob eo hor repu uhel.  Ehan

⁹ Deuit ha gwelit oberennoù an AOTROU, an distrujoù en deus graet war an douar.

¹⁰ Lakaet en deus ar brezelioù da baouez betek penn an douar, terriñ a ra ar gwaregoù ha bruzunañ ar goafioù, deviñ a ra ar c'hirri en tan.

¹¹ Paouezit hag anavezit eo me a zo Doue, me a vo meulet e-touez ar pobloù, me a vo meulet dre an douar holl.

¹² AOTROU an armeoù a zo ganeomp, Doue Jakob eo hor repu uhel.  Ehan