Salmoù 45 - Bibl Koad 21: Ar Bibl e Brezhoneg evit ar Vretoned

Salm 45

¹ D'ar mestr-kaner; "Maskil" mibien Kora; kanaouenn-eured war "Shoshannim".

² Va c'halon a virvilh evit disklêriañ ur gomz burzhudus. Lavarout a ran: Va oberenn a vo evit ar roue, va zeod a vo evel pluenn ur skrivagner ampart.

³ Ar c'haerañ eus mibien an dud ez out, an drugarez a zo skuilhet war da vuzelloù, ha Doue en deus da venniget da viken.

⁴ Den galloudek, gouriz ouzh da gostez da gleze, da veurded ha da c'hloar!

⁵ Marc'heka en gloar, pign war da garr, evit ar wirionez, ar vadelezh hag ar reizhder. Da du dehou a ziskouezo dit burzhudoù spontus!

⁶ Da viroù a zo lemm, mont a raint da galon enebourien ar roue, pobloù a gouezho dindanout.

⁷ Da dron, o Doue, a chom dalc'hmat ha da viken! Gwalenn da ren a zo ur walenn a reizhder.

⁸ Karout a rez ar reizhder hag e kasaez an drougiezh, setu perak, o Doue, da Zoue en deus da olevet gant un eoul a levenez dreist da genseurted!

⁹ Ar mir, an aloez hag ar c'hasia a ro c'hwezh-vat da'z tilhad. Er palezioù olifant, c'hoari ar binvioù-kerdin a laouena ac'hanout.

¹⁰ Merc'hed rouaned a zo e-touez da itronezed a enor. Emañ ar rouanez a-zehou dit, gwisket gant aour Ofir.

¹¹ Selaou, plac'h yaouank, sell ha ro da skouarn, ankounac'ha da bobl ha ti da dad.

¹² Ar roue a c’hoantaio evitañ da gaerded. Pa'z eo da aotrou, stou dirazañ.

¹³ Merc'h Tir gant profoù, hag ar re binvidikañ eus ar bobl a zeuio da enoriñ ac'hanout.

¹⁴ Merc'h ar roue a zo karget a c'hloar e diabarzh ar palez, he dilhad a zo graet gant gwiadennoù aour;

¹⁵ kinniget eo d'ar roue, gwisket a vroderezhioù, ha war he lerc'h, ar gwerc'hezed, he mignonezed, a zo degaset dit.

¹⁶ Degaset int gant joa ha levenez, antren a reont e palez ar roue.

¹⁷ Da vibien a zalc'ho e-lec'h da dadoù, o lakaat a ri da briñsed war an douar holl.

¹⁸ Me a lakaio da anv da vezañ brudet en holl oadoù, evel-se ar pobloù a enoro ac'hanout dalc'hmat ha da viken.