Salmoù 44 - Bibl Koad 21: Ar Bibl e Brezhoneg evit ar Vretoned

Salm 44

¹ D'ar mestr-kaner; "Maskil" mibien Kora.

² O Doue! Klevet hon eus gant hon divskouarn, hon tadoù o deus disklêriet deomp an oberenn ac'h eus graet en o amzer, en deizioù a-wechall.

³ Gant da zorn ec'h eus kaset kuit pobloù evit o diazezañ, bruzunet ec'h eus pobloù evit reiñ lec'h dezho.

⁴ Rak n'eo ket dre o c'hleze o deus gounezet ar vro, ha n'eo ket o brec'h he deus o saveteet. Da du dehou, da vrec'h ha sklêrijenn da zremm eo, rak e kares anezho.

⁵ Te eo, o Doue, an hini a zo va Roue! Gourc'hemenn dieubidigezh Jakob.

⁶ Ganit e skoimp war hon enebourien, dre da anv e vac'himp ar re a savo a-enep deomp.

⁷ Rak ne fizian ket em gwareg, n'eo ket va c'hleze a zieubo ac'hanon.

⁸ Te eo an hini en deus hon saveteet eus hon enebourien, hag en deus rentet mezhek ar re a gasae ac'hanomp.

⁹ E Doue eo e kavomp gloar bemdez, hag e veulimp da anv da viken.  Ehan

¹⁰ Koulskoude ec'h eus hon taolet kuit ha goloet a zismegañs, ha ne gerzhez ken gant hon armeoù.

¹¹ Lakaet ec'h eus ac'hanomp da gilañ dirak an enebour, hag ar re hor c'hasa o deus tapet o freizh.

¹² Hor roet ec'h eus evel an deñved a zebrer, hor stlabezet ec'h eus e-touez ar broadoù.

¹³ Gwerzhañ a rez da bobl evit netra, hag e lakaez anezho e dister briz.

¹⁴ Hol lakaat a rez da vezañ dismegañset gant hon amezeien, goapaerezh ha c'hoariell ar re a zo en-dro deomp.

¹⁵ Hol lakaat a rez da vezañ mojenn ar broadoù. Ouzh hor gwelout, ar pobloù a hej o fenn.

¹⁶ Va dismegañs a zo atav dirazon hag ar vezh a c'holo va dremm,

¹⁷ pa vez klevet an hini a eneb ouzhin hag am heskin, ha pa vez gwelet an enebour hag ar veñjer.

¹⁸ Kement-se holl a zo erruet ganeomp. Koulskoude n'hon eus ket da ankounac'haet, n'hon eus ket torret da emglev,

¹⁹ hor c'halon n'eo ket aet war a-dreñv, hor pazioù n'int ket pellaet diouzh da hent,

²⁰ pa ec'h eus hor bountet e-touez an aourgon, hag hor goloet gant skeud ar marv.

²¹ Mar hor bije ankounac'haet anv hon Doue, hag astennet hon daouarn etrezek un doue estren,

²² Doue, ha n'en dije ket enklasket, eñ hag a anavez traoù kuzhet ar c'halonoù?

²³ Met abalamour dit-te, omp lakaet d'ar marv bemdez, ha sellet evel deñved kempennet d'ar gigerezh.

²⁴ Sav! Perak e kouskez, AOTROU? Dihun, n'hon taol ket kuit da viken!

²⁵ Perak e kuzhez da zremm? Perak ec'h ankounac'haez hor reuzeudigezh hag hor gwaskerezh?

²⁶ Rak hon ene a zo diskaret er poultr, hag hor c'hof a zo stag ouzh an douar.

²⁷ Sav da sikour ac'hanomp, ha daspren ac'hanomp, abalamour da'z madelezh!