Salmoù 41 - Bibl Koad 21: Ar Bibl e Brezhoneg evit ar Vretoned

Salm 41

¹ D'ar mestr-kaner; salm David.

² Eürus eo an hini a laka evezh ouzh an ezhommeg. Da zeiz ar gwalleur an AOTROU en dieubo.

³ An AOTROU en diwallo hag a viro e vuhez, eürus e vo war an douar, ha ne roi ket anezhañ da c'hoant e enebourien.

⁴ An AOTROU a skoazello anezhañ war ar gwele a boan, cheñch a ri e wele holl pa vo klañv.

⁵ Lavaret em eus: AOTROU, az pez truez ouzhin, yac'ha va ene, rak pec'het em eus en da enep!

⁶ Va enebourien a c'hoanta droug din o lavarout: Pegoulz e varvo? Pegoulz ez aio e anv da netra?

⁷ Mar deu unan bennak da'm gweladenniñ, e lavar din gevier, e galon a zastum soñjoù fall, mont a ra er-maez hag e komz.

⁸ An holl re a gasa ac'hanon a guzulik etrezo em enep, irienniñ a reont va c'holl.

⁹ Ur gwall bennak a bouezh warnañ, setu eñ gourvezet, emezo, ha ne adsavo ken.

¹⁰ An den zoken, hag e oan e peoc'h gantañ, an hini en doa va fiziañs hag a zebre bara ganin, en deus savet e droad em enep.

¹¹ Met te, AOTROU, az pez truez ouzhin hag va adsav! Ha me a rento dezho.

¹² Dre gement-mañ ec'h anavezan e kavez plijadur ennon: va enebour ne laouena ket diwar va fenn.

¹³ Va miret ec'h eus em eeunder, va lakaet ec'h eus da viken dirazout.

¹⁴ Benniget ra vo an AOTROU, Doue Israel, a holl viskoazh da holl viken! Amen! Ya, amen!