Salmoù 39 - Bibl Koad 21: Ar Bibl e Brezhoneg evit ar Vretoned

Salm 39

¹ D'ar mestr-kaner; da "Jedutun"; salm David.

² Lavaret em eus: Eveshaat a rin ouzh va hentoù, evit na bec'hin ket gant va zeod; lakaat a rin ur brid war va genoù, e-keit ha ma vo an den drouk dirazon.

³ Mut on chomet er sioulder, en em viret on da gomz zoken evit ar mad, ha va foan a zo kresket.

⁴ Va c'halon a zo loskus em diabarzh, va frederiadennoù a zo o teviñ evel un tan, ha va zeod en deus komzet:

⁵ AOTROU, ro din da anavezout va diwezh, ha pe muzul o deus va deizioù, ma ouezin pegen berr eo va buhez.

⁶ Setu ec'h eus lakaet va deizioù e muzul ar palvad, ha va oadvezh a zo dirazout evel un netra. Ya, pep den en e sav war an douar n'eo nemet c'hwez!  Ehan

⁷ Ya, an den a gerzh evel ur skeudenn. Ya, en aner eo e fiñv, daspugn a ra, ha ne oar ket piv a zastumo.

⁸ Ha bremañ AOTROU, petra am eus gortozet? Va esperañs a zo ennout.

⁹ Va dieub eus va holl fallagriezhoù, ha na'm laka ket da vezañ dismegañset evel an hini diskiant.

¹⁰ Tavet em eus, ne'm eus ket digoret va genoù, rak te eo an hini en deus oberiet.

¹¹ Distro diouzhin da gastizoù! Kuzumet on dindan taolioù da zorn.

¹² Pa gastizez an den en ur c'hourdrouz anezhañ evit e bec'hed, e kuzumez evel an tagn ar pezh a zo priziusañ dezhañ. Ya pep den n'eo nemet c'hwez!  Ehan

¹³ AOTROU, selaou va fedenn ha ro da skouarn da'm c'hriadenn, na chom ket bouzar da'm daeroù! Rak un diavaeziad on ez ti, ur beajour evel va holl dadoù.

¹⁴ Distro diouzhin da sell, ma c'hellin adkavout nerzh, a-raok ma'z in kuit ha ma ne vin ken.