Salmoù 38 - Bibl Koad 21: Ar Bibl e Brezhoneg evit ar Vretoned

Salm 38

¹ Salm David. Evit derc'hel soñj.

² AOTROU, na'm c'hastiz ket en da gounnar, ha na'm finij ket en da fulor.

³ Rak da viroù a zo aet ennon, ha da zorn a zo pounneraet warnon.

⁴ N'eus netra yac'h em c'hig en abeg da'z fulor, ha n'eus diskuizh ebet em eskern en abeg da'm fec'hed.

⁵ Rak va direizhder a uhela dreist va fenn, hag eo evel ur bec'h pounner re bouezus evidon.

⁶ Va goulioù a zo flaerius, hag e veront en abeg da'm follentez.

⁷ Krommaet ha pleget on en doare diwezhañ, a-hed an deiz e kerzhan e kañv,

⁸ rak va divgroazell a zo leun a c'hor, n'eus netra yac'h em c'hig.

⁹ Dinerzhet ha brevet on penn-da-benn, yudal a ran e trubuilh va c'halon.

¹⁰ Aotrou, va holl c'hoant a zo dirazout, ha va huanadenn n'eo ket kuzhet ouzhit.

¹¹ Va c'halon a sko, va nerzh am dilez, ha sklêrijenn va daoulagad zoken ne'm eus ken.

¹² Dirak an taol a sko ac'hanon, va mignoned ha va c'henseurted a chom a-sav, ha va c'herent a chom pell.

¹³ Ar re a glask va buhez a stegn antelloù din, ar re a glask va foan a gomz a zistruj, hag a-hed an deiz ec'h ijinont touelloù.

¹⁴ Met me, evel un den bouzar, ne glevan ket. Me a zo evel un den mut na zigor ket e c'henoù.

¹⁵ Ya, bez' on evel un den na glev ket ha n'en deus respont ebet en e c'henoù.

¹⁶ Rak ac'hanout-te, AOTROU, on en gortoz. Te a responto, Aotrou va Doue!

¹⁷ Rak lavaret em eus: Ra ne laouenaint ket diwar va fenn! Pa ramp va zroad, e savont em enep.

¹⁸ Prest on da gouezhañ, ha va glac'har a zo bepred dirazon.

¹⁹ Rak e tisklêrian va direizhder, hag enkrezet on abalamour da'm fec'hed.

²⁰ Koulskoude va enebourien a zo bev ha nerzhus, ar re am c'hasa hep abeg a zo niverus.

²¹ Rentañ a reont din an droug evit ar mad. Va enebourien int dre ma en em stagan d'ar mad.

²² Na'm dilez ket, o AOTROU! Va Doue, na bella ket diouzhin!

²³ Hast, deus da'm sikour, Aotrou, va dieubidigezh!