Salmoù 36 - Bibl Koad 21: Ar Bibl e Brezhoneg evit ar Vretoned

Salm 36

¹ D'ar mestr-kaner; salm David, servijer an AOTROU.

² Drougiezh an hini fall a lavar din e-kreiz va c'halon, penaos doujañs Doue n'emañ ket dirak e zaoulagad?

³ Rak en em luban e-unan dirak e zaoulagad, evit kas da benn e bec'hed hag embregañ e gasoni.

⁴ Komzoù e c'henoù n'int nemet drougiezh ha touellerezh, ne fell ket dezhañ bezañ skiantek hag ober ar mad.

⁵ Raktresañ a ra traoù direizh war e wele, en em zerc'hel a ra war un hent n'eo ket mat, ne gasa ket an droug.

⁶ AOTROU, da vadelezh a dap betek an neñvoù, da fealded betek ar c'hoabrennoù.

⁷ Da reizhder a zo evel menezioù Doue, da varnedigezhioù a zo un donder bras. AOTROU, diwall a rez an dud hag al loened.

⁸ O Doue, pegen prizius eo da vadelezh! Mibien an dud en em denn dindan skeud da eskell.

⁹ O gwalc'h a resevont eus fonnusted da di, hag e roez da evañ dezho e stêr da blijadurezh.

¹⁰ Rak mammenn ar vuhez a zo en da gichen, dre da sklêrijenn e welomp ar sklêrijenn.

¹¹ Kendalc'h da skuilhañ da vadelezh war ar re a anavez ac'hanout, ha da reizhder war an dud eeun a galon.

¹² Ra ne dostaio ket troad an hini lorc'hus ouzhin, ha ra ne vin ket brañsellet gant dorn an hini drouk.

¹³ Aze eo kouezhet ar vicherourien a zireizhder, diskaret int ha ne c'hellont ket adsevel.