Salmoù 35 - Bibl Koad 21: Ar Bibl e Brezhoneg evit ar Vretoned

Salm 35

¹ Salm David. AOTROU, va difenn a-enep va enebourien, stourm ouzh ar re a stourm ouzhin.

² Kemer ar skoed bihan hag ar skoed bras, ha sav da'm sikour!

³ Krog er goaf ha stank o zremen d'ar re a red war va lerc'h. Lavar da'm ene: Me eo da silvidigezh.

⁴ Ra vo mezhek ha toutek ar re a glask diskar va buhez, ra gilo ha ra ruzio ar re a glask va gwalleur!

⁵ Ra vint evel ar pell laosket en avel, ha ra gaso ael an AOTROU anezho kuit.

⁶ Ra vo o hent teñval ha risklus, ha ra redo ael an AOTROU war o lerc'h!

⁷ Rak hep abeg o deus stegnet o roued a-enep din war ur poull, hep abeg o deus e doullet evit lemel diganin va buhez.

⁸ Ra zeuio un distruj pront d'o zapout, ra vint kemeret er roued o deus stegnet, ra gouezhint enni ha ra varvint!

⁹ Ha va ene a laouenaio en AOTROU hag a drido en e zieubidigezh.

¹⁰ Va holl eskern a lavaro: AOTROU, piv a zo heñvel ouzhit, te hag a zieub an den glac'haret eus an hini a zo nerzhusoc'h egetañ, ya, an den glac'haret hag ar paour eus an hini en diwisk?

¹¹ Falstestoù a sav, goulenn a reont ouzhin traoù n'ouzon netra diwar o benn,

¹² rentañ a reont din an droug evit ar mad, va ene a zo en dilez.

¹³ Met me, pa oant klañv, me a wiske ur sac'h, me a boanie va ene gant ar yun, ha va fedenn a zistroe war va bruched.

¹⁴ Kerzhout a raen gorrek evel evit ur mignon pe ur breur, mont a raen pleget trist evel e kañvoù ur vamm.

¹⁵ Ha pa em eus brañsellet, ez int en em vodet laouen, en em vodet int hep ma ouien, o skeiñ ac'hanon, o regiñ ac'hanon hep paouez.

¹⁶ Gant tud drouk, goapaerien pilpous, o deus grigoñset o dent em enep.

¹⁷ AOTROU, betek pegoulz e weli kement-se? Dieub va ene eus o stignoù, va nemetañ eus al leon!

¹⁸ Da veuliñ a rin er vodadeg vras, da veuliñ a rin e-kreiz ur bobl niverus.

¹⁹ Ra ne laouenaio ket diwar va fenn va enebourien disleal, ra ne wigno ket gant o lagad ar re am c'hasa hep abeg!

²⁰ Rak ne gomzont ket a beoc'h, met raktresañ a reont touellerezh a-enep tud peoc'hiek ar vro.

²¹ Digeriñ a reont o genoù a-enep din o lavarout: A! A! Hol lagad en deus gwelet.

²² Gwelet ac'h eus, AOTROU, na dav ket! AOTROU, na chom ket pell diouzhin!

²³ Dihun, sav, va Doue ha va Aotrou, da reiñ din va gwir ha da zifenn va c'haoz!

²⁴ Va barn hervez da reizhder, AOTROU va Doue, ha ra ne laouenaint ket diwar va fenn!

²⁵ Ra ne lavarint ket en o c'halon: A! Laouen eo hon ene! Ra ne lavarint ket: E lonket hon eus!

²⁶ Ra vo mezhek ha toutek an holl re a laouena em gwalleur! Ra vo gwisket a vezh hag a spont ar re a sav lorc'hus a-enep din!

²⁷ Ra gano ha ra drido a levenez ar re a laouena em reizhadur! Ha ma lavarint hep paouez: Kanmeulet ra vo an AOTROU, en em blij e peoc'h e servijer.

²⁸ Neuze va zeod a zisklêrio da reizhder, ha bemdez e lavaro da veuleudioù.