Salmoù 34 - Bibl Koad 21: Ar Bibl e Brezhoneg evit ar Vretoned

Salm 34

¹ Salm David. Pa varvouzas an diskiant dirak Abimelek, ha penaos, kaset gantañ, ez eas kuit.

² Bennigañ a rin an AOTROU e pep amzer, e veuleudi a vo dalc'hmat em genoù.

³ Va ene a gavo gloar en AOTROU, ar re hegarat a glevo hag a laouenaio.

⁴ Kanmeulit an AOTROU ganin, uhelaomp e anv holl asambles!

⁵ Klasket em eus an AOTROU hag en deus respontet din, dieubet en deus ac'hanon eus va holl spontoù.

⁶ Ha sellet o deus outañ? Hag e voent sklêrijennet, n'o deus ket da ruziañ a vezh.

⁷ An den glac'haret-se en deus kriet, an AOTROU en deus e selaouet hag e zieubet eus e holl enkrezioù.

⁸ Ael an AOTROU a gamp en-dro d'ar re a zouj anezhañ, hag e tieub anezho.

⁹ Tañvait ha gwelit pegen mat eo an AOTROU! Eürus an den a ya etrezek ennañ.

¹⁰ Doujit an AOTROU, c'hwi e sent, rak ne vanko netra d'ar re a zouj anezhañ!

¹¹ Al leoned yaouank a anavez kernez ha naonegezh, met ar re a glask an AOTROU n'o devo ezhomm ebet.

¹² Deuit ha va selaouit, mibien, hag e teskin deoc'h doujañs an AOTROU.

¹³ Piv eo an den a gav plijadur da vevañ, hag a gar gwelout deizioù a eurvad?

¹⁴ Diwall da deod diouzh an droug, ha da vuzelloù diouzh komzoù touellus.

¹⁵ Distro diouzh an droug ha gra ar mad, klask ar peoc'h hag heuilh anezhañ.

¹⁶ Daoulagad an AOTROU a zo war ar re reizh, hag e zivskouarn a zo evezhius ouzh o c'hriadenn.

¹⁷ Dremm an AOTROU a zo a-enep ar re a ra an droug, evit lemel o eñvor a-ziwar an douar.

¹⁸ Pa gri ar re reizh, an AOTROU a selaou anezho, hag e tieub anezho eus o holl enkrezioù.

¹⁹ An AOTROU en em zalc'h tost d'ar re enkrezet o c'halon, hag a zieub ar re mantret o spered.

²⁰ An den reizh en deus poanioù e-leizh, met an AOTROU a zieub anezhañ diouto holl,

²¹ diwall a ra e holl eskern, hini ebet n'eo torret.

²² An droug a gas an den fall d'ar marv, hag ar re a gasa an hini reizh a vo distrujet.

²³ An AOTROU a zaspren ene e servijerien, hag hini eus ar re a ya d'e gavout ne vo distrujet.