Salmoù 32 - Bibl Koad 21: Ar Bibl e Brezhoneg evit ar Vretoned

Salm 32

¹ "Maskil" David. Eürus an den a zo pardonet dezhañ e zisentidigezh, hag a zo goloet e bec'hed!

² Eürus an den na damall an AOTROU dezhañ direizhder ebet, ha n'eus touell ebet en e spered!

³ Pa em eus tavet, eo va eskern en em guzumet, hag e huanaden a-hed an deiz,

⁴ rak deiz ha noz e poueze da zorn warnon. Va nerzh a zeue da vezañ sec'hded an hañv.  Ehan

⁵ Roet em eus da anavezout dit va fec'hed ha ne'm eus ket kuzhet ouzhit va direizhder. Lavaret em eus: Anzav a rin va disentidigezh d'an AOTROU. Ha te ac'h eus lamet poan va fec'hed.  Ehan

⁶ Evel-se pep den leal a aspedo ac'hanout en amzer ma vez kavet. Ha pa zic'hlanno an doureier bras, ne vo ket tapet ganto.

⁷ Te eo va repu, va diwall a rez eus an estrenvan, va gronnañ a rez gant kanaouennoù a zieubidigezh.  Ehan

⁸ Me az lakaio skiantek, me a gelenno dit an hent ma tleez kerzhout warnañ, da ren a rin, va lagad a vo warnout.

⁹ Na vezit ket evel ar marc'h hag evel ar vulez hep skiant, a vez stardet o genoù gant ur brid hag ur weskenn, gant aon na dostafent ouzhit.

¹⁰ Kalz a c'hlac'har a dapo an den fall, met ar c'hras a zo war-dro an hini a fiz en AOTROU.

¹¹ C'hwi tud reizh, laouenait en AOTROU ha tridit! Kanit gant levenez, c'hwi holl ar re eeun a galon!