Salmoù 31 - Bibl Koad 21: Ar Bibl e Brezhoneg evit ar Vretoned

Salm 31

¹ D'ar mestr-kaner; salm David.

² AOTROU, en em dennet on da'z kavout, ra ne vin ket mezhek, biken! Va deub dre da reizhder!

³ Stou da skouarn war-zu ennon, hast va dieubiñ. Bez va roc'h, va repu, va c’hreñvlec’h ma vin salvet ennañ!

⁴ Rak te eo va roc'h ha va c'hreñvlec'h, hag abalamour d'ar garantez ouzh da anv, em c'hundui hag em reni.

⁵ Va zennañ a ri eus ar pech o deus stegnet din, rak te eo va repu.

⁶ Lakaat a ran va spered etre da zaouarn, va dasprenet ec'h eus, o AOTROU, Doue a wirionez!

⁷ Kasaat a ran ar re en em ro d'ar fougeoù touellus. Evidon-me, lakaat a ran va fiziañs en AOTROU.

⁸ Tridal a rin hag e laouenain ez madelezh, rak gwelet ec'h eus va glac'har hag ec'h anavezez estrenvan va ene.

⁹ Ne'c'h eus ket va lakaet etre daouarn an enebour, roet ec'h eus frankiz din ha suraet eo va zreid.

¹⁰ AOTROU, az pez truez ouzhin dre ma'z on en estrenvan! Va lagad, va ene ha va c'hof a dreuta gant ar glac'har.

¹¹ Va buhez a steuz en doan, ha va bloavezhioù en huanadoù. Va nerzh a zo diskaret en abeg da'm direizhder, ha va eskern a zisec'h.

¹² En abeg da'm holl enebourien ez on un dra a zismegañs, a zismegañs vras evit va amezeien, hag un dra euzhus evit va mignoned. Ar re am gwel en diavaez a dec'h pell diouzhin.

¹³ Ar c'halonoù n'o deus ket soñj ac'hanon evel ma vefen un den marv, bez' on evel ul lestr torret.

¹⁴ Rak e klevan komzoù kuzhet kalz a dud. Emañ ar spont a bep tu, en em guzuliañ a reont a-unvan em enep, irienniñ a reont evit lemel va buhez diganin.

¹⁵ Met e fizian ennout, AOTROU. Lavaret em eus: Te eo va Doue!

¹⁶ Va amzerioù a zo etre da zaouarn. Va deub eus va enebourien hag eus va heskinerien.

¹⁷ Laka da zremm da splannañ war da servijer, va dieub dre da drugarez.

¹⁸ AOTROU, ra ne vin ket mezhek rak da aspedet em eus, ra vo mezhek ar re zrouk, ma vo o genoù serret e lec'h ar marv!

¹⁹ Ra vo mut ar muzelloù gaouiat, a zroukkomz a-enep an den reizh dre lavaroù fall, gant lorc'h ha dismegañs!

²⁰ Pegen bras eo ar madoù ac'h eus miret d'ar re a zouj ac'hanout, hag a skuilhez war ar re a ya etrezek ennout, dirak daoulagad an dud!

²¹ Koach a rez anezho e kuzh da zremm, pell diouzh kuzulioù an dud. Diwall a rez anezho ez teltenn a-enep argad an teodoù.

²² Benniget ra vo an AOTROU! Rak diskouezet en deus e vadelezh em c'heñver, ha va lakaet evel en ur c'hreñvlec'h.

²³ Me a lavare em hastidigezh: Lamet on a-zirak da zaoulagad. Met selaouet ec'h eus mouezh va fedennoù, pa em eus kriet dit.

²⁴ Karit an AOTROU, c'hwi holl e re garet-mat! An AOTROU a ziwall ar re leal, met d'ar re a labour gant lorc'h e ro kement o deus dellezet.

²⁵ Chomit start ha ra en em nerzho ho kalon, c'hwi holl hag a zo en gortoz eus an AOTROU!