Salmoù 27 - Bibl Koad 21: Ar Bibl e Brezhoneg evit ar Vretoned

Salm 27

¹ Salm David. An AOTROU eo va sklêrijenn ha va dieubidigezh: Dirak piv em befe aon? An AOTROU eo diwaller va buhez: Dirak piv e spontfen?

² Pa'z eo deuet ar re zrouk, va enebourien, a-enep din, evit va lonkañ, o-unan o deus pleget hag int kouezhet.

³ Pa gampfe un arme a-enep din, ne spontfe ket va c'halon. Pa savfe ar brezel a-enep din, eno e vefe va fiziañs.

⁴ Goulennet em eus un dra hepken digant an AOTROU, hag e klaskin anezhi: Eo ma chomin e ti an AOTROU holl zeizioù va buhez, evit arvestiñ ouzh splannder an AOTROU, hag evit selleta e balez.

⁵ Rak va c'huzhat a raio en e repu en deiz fall, va c'huzhat a raio e sekred e dabernakl. Sevel a raio ac'hanon war ur roc'h.

⁶ Ha bremañ va fenn a savo dreist va enebourien a zo en-dro din. Kinnig a rin en e dabernakl aberzhoù a levenez. Kanañ a rin meuleudioù d'an AOTROU.

⁷ AOTROU, selaou va mouezh, da aspediñ a ran, az pez truez ouzhin ha va selaou!

⁸ Va c'halon a lavar din eus da berzh: Klask va dremm! Me a glask da zremm, o AOTROU!

⁹ Na guzh ket da zremm ouzhin! Na zistaol ket kuit da servijer gant kounnar! Bet out va sikour, na'm dilez ket, na'm dilaosk ket, Doue va silvidigezh!

¹⁰ Pa o defe va dilezet va zad ha va mamm, an AOTROU am dastumo.

¹¹ AOTROU, desk din da hent, va ren dre ar wenodenn eeun, abalamour da'm enebourien.

¹² Na'm lez ket da gouezhañ e c'hoant va enebourien, rak falstestoù a zo savet a-enep din, ha ne analont nemet taerder.

¹³ A! Ma ne'm bije ket kredet e weljen madoù an AOTROU war zouar ar re vev! ...

¹⁴ Esper en AOTROU, chom start, ra en em greñvaio da galon! Ya, esper en AOTROU!