Salmoù 26 - Bibl Koad 21: Ar Bibl e Brezhoneg evit ar Vretoned

Salm 26

¹ Salm David. Ro va gwir din, o AOTROU, rak kerzhout a ran er wirionez, va fiziañs a lakaan en AOTROU, ne vrañsellan ket.

² AOTROU, va furch ha va amprou, evesha ouzh va lounezhi ha va c'halon!

³ Da vadelezh a zo dirak va daoulagad, hag e kerzhan en da wirionez.

⁴ Ne azezan ket gant an dud faos, ned-an ket gant an dud gaouiat.

⁵ Kasaat a ran bodadeg an dud fall, ne azezan ket gant ar re zrouk.

⁶ Gwalc'hiñ a ran va daouarn en dinammded, hag e ran an dro da'z aoter, o AOTROU,

⁷ evit trugarekaat ac'hanout a vouezh uhel, hag evit disklêriañ da holl vurzhudoù.

⁸ AOTROU, me a gar chom ez ti, e-lec'h m'emañ da c'hloar o chom.

⁹ Na zilam ket va ene gant ar bec'herien, na va buhez gant an dud wadsec'hedik,

¹⁰ ar re o deus torfedoù en o daouarn, ha profoù o leuniañ o dorn dehou.

¹¹ Met me a gerzho en dinammded. Va dieub, az pez truez ouzhin!

¹² Va zroad a chom start en hent eeun; er bodadegoù e vennigin an AOTROU.