Salmoù 25 - Bibl Koad 21: Ar Bibl e Brezhoneg evit ar Vretoned

Salm 25

¹ Salm David. AOTROU, sevel a ran va ene etrezek ennout.

² Va Doue, ennout e fizian, ra ne vin ket mezhek! Ra ne laouenaio ket va enebourien diwar va fenn!

³ A-dra-sur, hini eus ar re a zo en gortoz ac'hanout ne vo mezhek. Ar re-se a vo mezhek, ar re a ra gant fallentez hep abeg.

⁴ AOTROU, ro din da anavezout da hentoù, kelenn din da wenodennoù.

⁵ Gra din kerzhout en da wirionez ha va desk, rak te eo Doue va dieubidigezh, ha bemdez emaon en gortoz ac'hanout.

⁶ Az pez soñj eus da drugarezioù, o AOTROU, hag eus da vadelezh, rak int a zo a bep amzer.

⁷ Na'z pez ket soñj eus pec'hedoù va yaouankiz nag eus va disentidigezh. Hervez da drugarez, az pez soñj ac'hanon, abalamour da'z madelezh, o AOTROU!

⁸ An AOTROU a zo mat hag eeun, setu perak e kelenno an hent d'ar bec'herien.

⁹ Lakaat a raio ar re izel da gerzhout er wirionez, kelenn a raio e hent d'ar re izel.

¹⁰ Holl wenodennoù an AOTROU n'int nemet madelezh ha lealded evit ar re a vir e emglev hag e destenioù.

¹¹ Abalamour da garantez da anv, o AOTROU, e pardoni din va direizhder, ha bras eo.

¹² Piv eo an den a zouj an AOTROU? Kelenn a raio dezhañ an hent en deus da zibab.

¹³ E ene a chomo e-touez ar madoù, hag e lignez a berc'henno an douar.

¹⁴ Tra guzhet an AOTROU a zo evit ar re a zouj anezhañ, ha reiñ a raio da anavezout dezho e emglev.

¹⁵ Va daoulagad a sell hep ehan etrezek an AOTROU, rak lakaat a raio va zreid da zont er-maez eus ar roued.

¹⁶ Distro ouzhin ha kemer truez ouzhin, rak va-unan ez on ha glac'haret.

¹⁷ Enkrezioù va c'halon a zo kresket; va dieub eus va estrenvan.

¹⁸ Gwel va glac'har ha va labour, ha pardon din va holl bec'hedoù.

¹⁹ Gwel va enebourien rak niverus int; kasaat a reont ac'hanon eus ur gasoni garv.

²⁰ Diwall va ene ha va dieub, ma ne vin ket mezhek, rak en em dennet on da'z kavout!

²¹ Ra viro an onestiz hag ar reizhder ac'hanon, rak emaon en gortoz ac'hanout!

²² O Doue! Daspren Israel eus e holl c’hlac’haroù.