Salmoù 22 - Bibl Koad 21: Ar Bibl e Brezhoneg evit ar Vretoned

Salm 22

¹ D'ar mestr-kaner; salm David; war "Ayeled-ashac'har".

² Va Doue, va Doue, perak ec’h eus va dilezet, o pellaat diouzh va dieubidigezh ha diouzh komzoù va garm?

³ Va Doue, d'an deiz e krian ha ne respontez ket, d'an noz ha ne'm eus ket a ziskuizh.

⁴ Koulskoude ez out ar Sant, o chom e-kreiz meuleudi Israel.

⁵ Hon tadoù o deus lakaet o fiziañs ennout, ennout o deus lakaet o fiziañs ha te ac'h eus o dieubet.

⁶ Kriet o deus war-zu ennout hag ez int bet dieubet, lakaet o deus o fiziañs ennout ha n'int ket bet mezhek.

⁷ Met me a zo ur preñv ha n'on ket un den, dismegañs an dud hag an disprizet eus ar bobl.

⁸ An holl re am gwel a ra goap ouzhin, digeriñ a reont o genoù hag hejañ a reont o fenn:

⁹ War an AOTROU en em harp, ra en dieubo, ra en saveteo, pa en deus lakaet e garantez ennañ!

¹⁰ Ya, te ac'h eus va zennet eus kof va mamm, te ac'h eus va lakaet da ziskuizhañ e peoc'h war he bronn.

¹¹ Lakaet on bet e-barzh da zaouarn kerkent ha tennet eus he c'hof, adalek kof va mamm ez out bet va Doue.

¹² Na bella ket diouzhin rak an estrenvan a zo tost, ha n'eus den da'm sikour!

¹³ Koleoù e-leizh a zo en-dro din, koleoù galloudek Basan o deus va c’helc’hiet.

¹⁴ Digeriñ a reont o genoù em enep, evel ul leon o trailhañ hag o yudal.

¹⁵ Bez' on evel an dour a red, va holl eskern a zo diframmet, va c'halon a zo evel koar, o teuziñ e-kreiz ac'hanon.

¹⁶ Va nerzh a zo disec'het evel pri, va zeod a zo stag ouzh va staon, va gourvezet ec'h eus e poultrenn ar marv.

¹⁷ Rak chas a zo deuet en-dro din, un engroez a dud fall o deus va enkelc'hiet, toullet o deus va daouarn ha va zreid.

¹⁸ Niveriñ a ran va holl eskern. Emaint ar re-se oc'h eveshaat hag o sellout ouzhin.

¹⁹ Lodennañ a reont va dilhad etrezo, teurel a reont va zoneg d'ar sord.

²⁰ Te eta, AOTROU, na chom ket pell diouzhin! Te, va nerzh, hast va sikour!

²¹ Dieub va ene eus ar c'hleze, va nemetañ eus pav ar chas!

²² Va savete eus genoù al leon, va zenn eus kerniel ar bualed!

²³ Embann a rin da anv da'm breudeur, da veuliñ a rin e-kreiz ar vodadeg.

²⁴ C'hwi hag a zouj an AOTROU, meulit eñ! Holl ouenn Jakob, roit gloar dezhañ! Holl ouenn Israel, krenit dirazañ!

²⁵ Rak n'en deus ket disprizet na dismegañset glac'har an hini glac'haret, n'en deus ket kuzhet e zremm outañ, met e selaouet en deus pa grie dezhañ.

²⁶ Meulet e vi ganin er vodadeg vras; peurober a rin va gouestloù dirak ar re a zouj ac'hanout.

²⁷ Ar beorien a zebro hag o devo o gwalc'h, ar re a glask an AOTROU a veulo anezhañ. Ho kalon a vevo da viken!

²⁸ Holl bennoù an douar o devo soñj a gement-se hag a zistroio d'an AOTROU, holl diegezhioù ar broadoù a stouo dirak da zremm.

²⁹ Rak ar rouantelezh a zo d'an AOTROU, hag e ren war ar broadoù.

³⁰ Holl binvidien an douar a zebro ivez hag a stouo, an holl re a ziskenn war-zu ar poultr hag an hini na c'hell ket mirout e vuhez a blego dirazañ.

³¹ An diskennidi a servijo anezhañ, ha komzet e vo diwar-benn an Aotrou d'ar rummad da zont.

³² Dont a raint hag e tisklêrint e reizhder d'ar bobl a c'hano, rak en devo graet an traoù-se.