Salmoù 21 - Bibl Koad 21: Ar Bibl e Brezhoneg evit ar Vretoned

Salm 21

¹ D'ar mestr-kaner; salm David.

² AOTROU, ar roue a laouena ez kalloud. Pegen bras eo al levenez a ro dezhañ da silvidigezh!

³ Roet ec'h eus dezhañ c'hoant e galon, ha ne'c'h eus ket taolet kuit pedenn e vuzelloù.  Ehan

⁴ Diaraoget ec'h eus anezhañ gant bennozhioù mat, lakaet ec'h eus war e benn ur gurunenn aour fin.

⁵ Goulenn a rae ouzhit ar vuhez, hag he roet ec'h eus dezhañ, ur pad hir a zeizioù, dalc'hmat ha da viken.

⁶ E c'hloar a zo bras a-drugarez da'z tieubidigezh, e c'holoet ec'h eus a splannder hag a veurded.

⁷ Ober a rez anezhañ ur vennozh da viken, e leuniañ a rez a levenez dirazout.

⁸ Ar roue a laka e fiziañs en AOTROU, ha dre vadelezh an Uhel-Meurbet ne vo ket brañsellet.

⁹ Da zorn a dapo da holl enebourien, da du dehou a dapo ar re a gasa ac'hanout.

¹⁰ O lakaat a ri evel ur forn-dan pa en em ziskouezi. An AOTROU o lonko en e gounnar, an tan o fulluc'ho.

¹¹ Lakaat a ri da vervel o frouezh a-ziwar an douar, hag o gouenn a-douez mibien an dud.

¹² Mennet o deus droug a-enep dit, ijinet o deus soñjoù fall, met ne c'hellint ket dont a-benn,

¹³ rak lakaat a ri anezho da dec'hout, stegnañ a ri da wareg a-enep o dremm.

¹⁴ Sav, AOTROU, en da nerzh! Ni a gano hag a veulo da c'halloud.