Salmoù 2 - Bibl Koad 21: Ar Bibl e Brezhoneg evit ar Vretoned

Salm 2

¹ Perak ez eus ar grozmol-se e-touez ar broadoù, ha perak o deus ar pobloù divizet traoù ven?

² Rouaned an douar a zo en em savet, hag ar briñsed a zo en em zastumet a-gevret, a-enep an AOTROU hag a-enep e Olevad.

³ Torromp o ereoù, taolomp pell diouzhimp o chadennoù!

⁴ An hini a zo azezet en neñvoù a c'hoarzho, an AOTROU a raio goap anezho.

⁵ Neuze e komzo outo en e gounnar, hag e spourono anezho en e fulor:

⁶ Me am eus santelaet va roue war Sion, va menez santel.

⁷ Embann a rin an dekred: An AOTROU en deus lavaret din: Te eo va Mab, hiziv em eus da c'hanet.

⁸ Goulenn diganin hag e roin dit ar broadoù da hêrezh, pennoù an douar da zalc'h.

⁹ O freuzañ a ri gant ur walenn houarn, o bruzunañ a ri evel lestr ur poder.

¹⁰ Bremañ eta, rouaned, bezit fur! Degemerit kelennadurezh, barnerien an douar!

¹¹ Servijit an AOTROU gant doujañs, laouenait gant krenadenn.

¹² Enorit ar mab, gant aon na zeufe droug ennañ ha na marvfec'h en hoc'h hent, pa entano e gounnar a-greiz-holl. Eürus eo an holl re a laka o fiziañs ennañ!