Salmoù 17 - Bibl Koad 21: Ar Bibl e Brezhoneg evit ar Vretoned

Salm 17

¹ Pedenn David. AOTROU, selaou va c'haoz reizh, bez evezhius ouzh va c'hriadenn, ro da skouarn d'ar bedenn a ran dit gant muzelloù na douell ket!

² Ra en em ziskouezo va gwir dirak da zremm, ra welo da zaoulagad va eeunder!

³ Furchet ec'h eus va c'halon, va gweladennet ec'h eus en noz, va amprouet ec'h eus, ne gavez netra. Va c'homz n'eo ket aet en tu all da'm soñj.

⁴ Diwar-benn oberioù an dud, hervez komz da vuzelloù, en em ziwallet on diouzh hent an den taer.

⁵ Va c’hammedoù a zo start en da wenodennoù, va zreid ne vrañsellont ket.

⁶ Da aspediñ a ran, rak te am selaou, o Doue! Stou da skouarn war-zu ennon, selaou va ger!

⁷ Diskouez da vadelezhioù, o te hag a zieub gant da du dehou diouzh o enebourien ar re a ya da'z kavout!

⁸ Va diwall evel an ibil-lagad. Va golo dindan skeud da eskell,

⁹ a-enep ar re zrouk a wask ac'hanon, a-enep va enebourien marvus a zo en-dro din.

¹⁰ Serriñ a reont o c'halonoù kaledet, o genoù a gomz gant rogentez.

¹¹ Dija emaint en-dro d'hor c'hammedoù, hor spiañ a reont evit hon teurel d'an douar.

¹² Heñvel int ouzh al leon na c'houlenn nemet regiñ, ouzh al leon yaouank en em zalc'h e ged.

¹³ Sav, AOTROU, a-ziarbenn dezhañ, diskar anezhañ, dieub va ene diouzh an hini drouk dre da gleze!

¹⁴ Dre da zorn, AOTROU, dieub diouzh an dud, diouzh tud ar bed-mañ; o lodenn a zo er vuhez-mañ, leuniañ a rez o c'hof gant da vadoù, o mibien a zo leuniet hag e lezont an nemorant d'o bugale-vihan.

¹⁵ Evidon-me, er reizhder e welin da zremm. Pa zihunin, e vin leuniet gant da skeudenn.