Salmoù 147 - Bibl Koad 21: Ar Bibl e Brezhoneg evit ar Vretoned

Salm 147

¹ Meulit an AOTROU! Rak mat eo kanañ d'hon Doue, rak dous eo, dereat eo e veuliñ.

² An AOTROU eo a sav Jeruzalem, a zastum re stlabezet Israel,

³ a yac'ha ar re o deus ar c'halon flastret, hag a lien o goulioù.

⁴ Kontañ a ra niver ar stered, o gervel a ra holl dre o anv.

⁵ Meur eo hon Aotrou, e c'halloud a zo bras, e skiant a zo divent.

⁶ An AOTROU a skoazell ar re izel, hag ec'h izela ar re zrouk betek an douar.

⁷ Kanit d'an AOTROU gant trugarekadennoù, meulit hon Doue gant an delenn.

⁸ Goleiñ a ra an neñvoù gant ar c'houmoul, kempenn a ra ar glav evit an douar, lakaat a ra ar geot da ziwanañ war ar menezioù,

⁹ reiñ a ra ar boued d'ar chatal, ha da re vihan ar vran o krial.

¹⁰ Ne laka ket e blijadur e nerzh ar marc'h, ne ra van ebet eus divhar an den,

¹¹ an AOTROU a gav e blijadur er re a zouj anezhañ, er re a zo en gortoz eus e vadelezh.

¹² Jeruzalem, kan d'an AOTROU! Sion, meul da Zoue!

¹³ Rak startaet en deus barrennoù da zorojoù, benniget en deus da vibien en da greiz,

¹⁴ reiñ a ra ar peoc'h da'z harzoù, da leuniañ a ra eus druzoni ar gwinizh.

¹⁵ Kas a ra e c'her war an douar, hag e gomz a red buan.

¹⁶ Reiñ a ra an erc'h heñvel ouzh ar gloan, hag e skuilh ar rev gwenn evel ludu.

¹⁷ Teurel a ra skorn evel dre dammoù, piv a bado dirak e yenijenn?

¹⁸ Kas a ra e gomz, hag o laka da deuziñ. Lakaat a ra e avel da c'hwezhañ, hag e red an doureier.

¹⁹ Diskuliet en deus e gomz da Jakob, e reolennoù hag e varnedigezhioù da Israel.

²⁰ N'en deus graet evel-se da vroad all ebet, ha n'anavezont ket e varnedigezhioù. Meulit an AOTROU!.