Salmoù 144 - Bibl Koad 21: Ar Bibl e Brezhoneg evit ar Vretoned

Salm 144

¹ Salm David. Benniget ra vo an AOTROU, va roc'h, a zoare va daouarn d'ar brezel ha va bizied d'an emgann,

² va madoberour ha va c’hreñvlec’h, va repu uhel ha va dieuber, va skoed hag an hini en em dennan ennañ, an hini a renk va fobl dindanon!

³ AOTROU, petra eo an den evit ma ec'h eus evezh outañ, ha mab an den evit ma talc'hez soñj anezhañ?

⁴ An den a zo heñvel ouzh ur c'hwezhadenn, e zeizioù a zo evel ur skeudenn a dremen.

⁵ AOTROU, izela da neñvoù ha diskenn, stok ouzh ar menezioù ma vogedint!

⁶ Laka al luc'hed da lugerniñ ha stlabez anezho, stlap da viroù hag o strew!

⁷ Astenn da zaouarn eus an nec'h, va dieub ha va zenn eus an doureier bras, eus dorn bugale an diavaeziad,

⁸ a lavar gaou o genoù hag a zo touellus o dorn dehou.

⁹ O Doue, kanañ a rin dit ur ganaouenn nevez, da veuliñ a rin war al lourenn a zek kordenn.

¹⁰ Te a ro an dieubidigezh d'ar rouaned, hag a savete David da servijer eus ar c'hleze lazhus.

¹¹ Va dieub ha va zenn eus dorn bugale an diavaeziad, a lavar gaou o genoù hag a zo touellus o dorn dehou.

¹² Ra vo hor mibien evel gwez o kreskiñ en o yaouankiz, hor merc'hed evel peulioù kizellet o kaeraat kornioù ur palez!

¹³ Ra vo hor c'havioù leuniet, o kinnig pep seurt traoù! Ra gresko hon deñved dre vilieroù ha dre zek milieroù en hor parkeier!

¹⁴ Ra vo hon ejened bec'hiet gant lard! Ra ne vo na toull na harz na klemm en hor straedoù!

¹⁵ Eürus ar bobl emañ an traoù evel-se ganti! Eürus ar bobl eo an AOTROU he Doue!