Salmoù 143 - Bibl Koad 21: Ar Bibl e Brezhoneg evit ar Vretoned

Salm 143

¹ Salm David. AOTROU, selaou va goulenn, ro da skouarn da'm fedennoù, respont din ez fealded, ez reizhder!

² Ned a ket da varn da servijer, rak den bev ebet ne vo reizh dirazout.

³ An enebour a glask va ene, gwaskañ a ra va buhez d'an douar, va lakaat a ra da chom en deñvalijenn, evel a re a zo marv abaoe pell zo.

⁴ Va spered a zo dinerzhet ennon, va c'halon a zo trubuilhet em c'hreiz.

⁵ Soñj am eus eus an deizioù a-wechall, prederiañ a ran war da holl oberennoù, en em soñjal a ran e labourioù da zaouarn.

⁶ Astenn a ran va daouarn war-zu ennout, va ene en deus sec'hed ac'hanout evel un douar kras.  Ehan

⁷ AOTROU, hast respont din! Va spered en em guzum. Na guzh ket da zremm ouzhin, gant aon na zeufen da vezañ heñvel ouzh ar re a ziskenn er poull.

⁸ Gra din klevout da vadelezh adalek ar beure, rak e fizian ennout, hag anavezout an hent am eus da gerzhout warnañ, rak savet em eus va ene war-zu ennout.

⁹ AOTROU, va dieub eus va enebourien! Rak en em dennet on da'z kavout.

¹⁰ Desk din ober da volontez, rak te eo va Doue. Ra reno da Spered mat ac'hanon war an hent eeun!

¹¹ AOTROU, ro din ar vuhez dre garantez evit da anv. Ez reizhder, tenn va ene eus an estrenvan!

¹² Hag ez madelezh, lam va enebourien kuit, distruj an holl re a heskin va ene, rak da servijer ez on-me.