Salmoù 142 - Bibl Koad 21: Ar Bibl e Brezhoneg evit ar Vretoned

Salm 142

¹ "Maskil" David, pa oa er vougev; pedenn.

² Gant va mouezh e krian d'an AOTROU, gant va mouezh ec'h aspedan an AOTROU.

³ Skuilhañ a ran va c'hlemm dirazañ, kontañ a ran va estrenvan dezhañ.

⁴ Pa emañ va spered dinerzhet ennon, te a anavez va hent. Kuzhet o deus ur pech din en hent a gerzhen warnañ.

⁵ Sell ouzh va zu dehou ha gwel! Den ne anavez ac'hanon, pep degemer a vank din, den n'eo chalet gant va ene.

⁶ AOTROU! Krial a ran dit hag e lavaran: Te eo va repu, va lodenn e douar ar re vev.

⁷ Bez evezhius ouzh va c'hriadenn, rak gwall ezhommek on. Va dieub eus ar re a red war va lerc'h, rak kreñvoc'h int egedon.

⁸ Tenn va ene eus e doull-bac'h, evit ma veulin da anv. Ar re reizh a zeuio en-dro din, rak graet ez po vad din.