Salmoù 136 - Bibl Koad 21: Ar Bibl e Brezhoneg evit ar Vretoned

Salm 136

¹ Meulit an AOTROU rak mat eo, rak e drugarez a bad da viken!

² Meulit Doue an doueoù, rak e drugarez a bad da viken!

³ Meulit Aotrou an aotrounez, rak e drugarez a bad da viken,

⁴ an hini hepken a ra burzhudoù bras, rak e drugarez a bad da viken!

⁵ An hini en deus graet an neñvoù gant skiant, rak e drugarez a bad da viken,

⁶ en deus astennet an douar war an doureier, rak e drugarez a bad da viken,

⁷ en deus graet ar goulaouennoù bras, rak e drugarez a bad da viken,

⁸ an heol evit ren war an deiz, rak e drugarez a bad da viken,

⁹ al loar hag ar stered evit ren war an noz, rak e drugarez a bad da viken!

¹⁰ An hini en deus skoet an Ejipt en he re gentañ-ganet, rak e drugarez a bad da viken,

¹¹ hag en deus lakaet Israel da vont er-maez eus o zouez, rak e drugarez a bad da viken,

¹² dre un dorn nerzhus hag ur vrec'h astennet, rak e drugarez a bad da viken!

¹³ An hini en deus faoutet ar Mor Ruz en daou, rak e drugarez a bad da viken,

¹⁴ en deus lakaet Israel da dremen dre e greiz, rak e drugarez a bad da viken,

¹⁵ en deus diskaret Faraon hag e arme er Mor Ruz, rak e drugarez a bad da viken!

¹⁶ An hini en deus renet e bobl er gouelec'h, rak e drugarez a bad da viken,

¹⁷ en deus skoet war rouaned bras, rak e drugarez a bad da viken,

¹⁸ en deus lazhet rouaned meur, rak e drugarez a bad da viken,

¹⁹ Sihon, roue an Amoreaned, rak e drugarez a bad da viken,

²⁰ Og, roue Basan, rak e drugarez a bad da viken,

²¹ en deus roet o bro da hêrezh, rak e drugarez a bad da viken,

²² da hêrezh da Israel e servijer, rak e drugarez a bad da viken!

²³ An hini en deus bet soñj ac'hanomp pa oamp izelaet, rak e drugarez a bad da viken,

²⁴ en deus hon dieubet eus hon enebourien, rak e drugarez a bad da viken!

²⁵ An hini a ro bevañs da bep kig, rak e drugarez a bad da viken!

²⁶ Meulit Doue an neñvoù, rak e drugarez a bad da viken!