Salmoù 135 - Bibl Koad 21: Ar Bibl e Brezhoneg evit ar Vretoned

Salm 135

¹ Meulit an AOTROU! Meulit anv an AOTROU, meulit eñ servijerien an AOTROU!

² C'hwi hag en em zalc'h e ti an AOTROU, war leurennoù ti hon Doue,

³ meulit an AOTROU, rak an AOTROU a zo mat! Kanit d'e anv rak trugarezus eo.

⁴ Rak an AOTROU en deus dibabet Jakob, hag Israel evit e zalc'h,

⁵ rak gouzout a ran eo bras an AOTROU hag hon Aotrou dreist an holl zoueoù.

⁶ An AOTROU a ra kement a fell dezhañ en neñvoù ha war an douar, er morioù hag en holl zonderioù.

⁷ Eñ eo a laka an aezhennoù da sevel eus penn an douar, a ra al luc'hed hag ar glav, a denn an avel eus e deñzorioù.

⁸ Eñ eo a skoas re gentañ-ganet an Ejipt, adalek an dud betek al loened,

⁹ a gasas sinoù ha burzhudoù en da greiz, Ejipt, a-enep Faraon hag a-enep e holl servijerien,

¹⁰ a skoas meur a vroad, a lakaas d'ar marv rouaned galloudus:

¹¹ Sihon, roue an Amoreaned, Og, roue Basan, hag holl rouaned Kanaan,

¹² eñ a roas o bro da hêrezh, da hêrezh da Israel e bobl.

¹³ AOTROU, da anv a bad da viken. AOTROU, an eñvor ac'hanout a zo a oad da oad.

¹⁴ Rak an AOTROU a raio reizhder d'e bobl, truez en devo ouzh e servijerien.

¹⁵ Idoloù ar broadoù a zo arc'hant hag aour, ul labour daouarn den.

¹⁶ Ur genoù o deus ha ne gomzont ket, daoulagad o deus ha ne welont ket,

¹⁷ divskouarn o deus ha ne glevont ket, n'eus ket kennebeut a c'hwezhadenn en o genoù.

¹⁸ Ar re o gra hag ar re holl a fiz enno a zeu heñvel outo!

¹⁹ Ti Israel, bennigit an AOTROU! Ti Aaron, bennigit an AOTROU!

²⁰ Ti Levi, bennigit an AOTROU! C'hwi a zouj an AOTROU, bennigit an AOTROU!

²¹ Benniget ra vo eus Sion an AOTROU, eñ hag a zo o chom e Jeruzalem! Meulit an AOTROU!