Salmoù 132 - Bibl Koad 21: Ar Bibl e Brezhoneg evit ar Vretoned

Salm 132

¹ Kanaouenn ar "Maalod". AOTROU, az pez soñj eus David hag eus e holl c'hlac'har.

² Eñ hag a douas d'an AOTROU, hag e reas ar gouestl-mañ da C'halloudeg Jakob:

³ Ned in ket dindan teltenn va zi, ne bignin ket war ar gwele ma tiskuizhan,

⁴ ne roin ket morgousk da'm daoulagad, na diskuizh da'm malvennoù,

⁵ ken na'm bo kavet ul lec'h evit an AOTROU, ur chomlec'h evit Galloudeg Jakob!

⁶ Setu, klevet hon eus komz diwarnañ en Efrata, kavet hon eus anezhañ e parkeier Yaar.

⁷ Deomp en e chomlec'hioù, stouomp dirak skabell e dreid!

⁸ Sav, o AOTROU, deus da lec'h da ziskuizh, te hag arc'h da nerzh!

⁹ Ra vo da aberzhourien gwisket a reizhder, ha ra gano da re garet-mat gant levenez!

¹⁰ Abalamour da Zavid da servijer, na daol ket kuit dremm da Olevad!

¹¹ An AOTROU en deus touet ar wirionez da Zavid, ha ne zislavaro ket: Lakaat a rin war da dron frouezh da gof.

¹² Mar vir da vibien va emglev ha va zestenioù a zeskin dezho, o mibien ivez, da viken, a vo azezet war da dron.

¹³ Rak an AOTROU en deus dibabet Sion, hag he c'havet mat evit ober enni e chomlec'h.

¹⁴ Bez' eo lec'h va diskuizh, da viken. Enni e vin o chom, rak he dibabet em eus.

¹⁵ Bennigañ a rin gant fonnuster he bevañs, leuniañ a rin a vara he feorien.

¹⁶ Me a wisko a silvidigezh e aberzhourien, hag e re leal a gano gant ul levenez vras.

¹⁷ Eno eo e lakain ur c'horn da sevel da Zavid, hag e kempennin ul lamp da'm Olevad.

¹⁸ Goleiñ a rin a vezh e enebourien, ha warnañ e lugerno e dalgen.