Salmoù 129 - Bibl Koad 21: Ar Bibl e Brezhoneg evit ar Vretoned

Salm 129

¹ Kanaouenn ar "Maalod". Va gwasket kalz o deus adalek va yaouankiz, ra lavaro Israel,

² va gwasket kalz o deus adalek va yaouankiz, met n'o deus ket trec'het warnon.

³ Labourerien-douar o deus aret va c'hein, merket o deus penn da benn o irvi.

⁴ An AOTROU a zo reizh, troc'het en deus kerdin ar re zrouk.

⁵ An holl re a gasa Sion a vo mezhekaet ha kaset war-dreñv.

⁶ Bez' e vint evel geot an toennoù, a sec'h a-raok ma kresk.

⁷ Ar meder ne leugn ket e zorn gantañ, nag an endrammer e zivrec'h,

⁸ hag an dremenerien ne lavaront ket: Bennozh Doue ra vo warnoc'h! Ni ho pennig en anv an AOTROU!