Salmoù 125 - Bibl Koad 21: Ar Bibl e Brezhoneg evit ar Vretoned

Salm 125

¹ Kanaouenn ar "Maalod". Ar re a fiz en AOTROU a zo evel Menez Sion, na c'hell ket bezañ brañsellet, hag a bad da viken.

² Emañ menezioù en-dro da Jeruzalem, hag emañ an AOTROU en-dro d'e bobl, a-vremañ ha da viken.

³ Rak gwalenn an drougiezh ne chomo ket war lodenn ar re reizh, gant aon na lakafe ar re reizh o daouarn en drougiezh.

⁴ AOTROU, gra vad d'ar re vat, d'ar re o deus ar galon eeun!

⁵ Met evit ar re a zibab hentoù troidellek, an AOTROU a raio dezho kerzhout gant ar vicherourien a zireizhder. Ra vo ar peoc'h war Israel!