Salmoù 121 - Bibl Koad 21: Ar Bibl e Brezhoneg evit ar Vretoned

Salm 121

¹ Kanaouenn ar "Maalod". Sevel a ran va daoulagad etrezek ar menez, a-belec'h e teuio sikour din.

² Va sikour a zeu digant an AOTROU, en deus graet an neñvoù hag an douar.

³ Ne lezo ket da droad da vrañsellat. An hini a ziwall ac'hanout ne gousko ket.

⁴ Setu, an hini a ziwall Israel ne gousko ket ha ne voredo ket.

⁵ An AOTROU eo an hini a ziwall ac'hanout. An AOTROU eo da skeud, emañ a-zehou dit.

⁶ An heol ne skoio ket ac'hanout e-pad an deiz, nag al loar e-pad an noz.

⁷ An AOTROU a ziwallo ac'hanout diouzh pep droug, diwall a raio da ene.

⁸ An AOTROU a ziwallo da zont ha da vont, a-vremañ ha da viken.