Salmoù 120 - Bibl Koad 21: Ar Bibl e Brezhoneg evit ar Vretoned

Salm 120

¹ Kanaouenn ar "Maalod". Kriet em eus d'an AOTROU em estrenvan, hag en deus va selaouet.

² AOTROU, dieub va ene eus ar muzelloù gaouiat, eus an teod touellus!

³ Petra a roio dit an teod tromplus, petra a c'hounezi gantañ?

⁴ Biroù lemm evel reoù ur brezelour, gant glaou-bev ar balan.

⁵ Gwalleürus on da chom e Meshek, da vezañ e-touez teltennoù Kedar!

⁶ Re bell eo chomet va ene gant an hini a gasa ar peoc'h.

⁷ Me a gar ar peoc'h, met kerkent ha ma komzan, emaint evit ar brezel.