Salmoù 119 - Bibl Koad 21: Ar Bibl e Brezhoneg evit ar Vretoned

Salm 119 א Alef

א Alef

¹ Eürus ar re a zo eeun en o hent, a gerzh hervez lezenn an AOTROU!

² Eürus ar re vir e destenioù, a glask anezho a-greiz o c'halon,

³ na reont ket an direizhder, hag a gerzh en e hentoù!

⁴ Urzhiet ec'h eus da gemennadurioù, evit ma vint miret gant evezh.

⁵ O! Ra vo reizhet mat va hentoù, evit ma virin da reolennoù.

⁶ Neuze ne ruzin ket o sellout ouzh da holl c'hourc'hemennoù.

⁷ Da veuliñ a rin en eeunder va c'halon, pa em bo desket da varnedigezhioù reizh.

⁸ Fellout a ra din mirout da reolennoù. Na'm dilez ket a-grenn!

⁹ Penaos e lakaio an den yaouank e hent da vezañ glan? O teurel evezh outañ hervez da gomz.

¹⁰ Da glask a ran eus kreiz va c'halon, na'm lez ket da zieñchañ pell diouzh da c'hourc'hemennoù!

¹¹ Dalc'het em eus da c'her em c'halon, evit na bec'hin ket en da enep.

¹² Ra vi benniget, o AOTROU! Desk din da reolennoù.

¹³ Disklêriañ a ran gant va muzelloù holl varnedigezhioù da c'henoù.

¹⁴ Laouenaat a ran en hent eus da destenioù, evel ma vefe ganin holl binvidigezhioù.

¹⁵ Prederiañ a rin war da gemennadurioù, hag e sellin ouzh da wenodennoù.

¹⁶ Kavout a rin va flijadur ez reolennoù, ha n'ankounac'hain ket da gomzoù.

ג Gimel

ג Gimel

¹⁷ Gra ar vadelezh-se da'z servijer, ma vevin ha ma virin da gomz.

¹⁸ Digor va daoulagad, evit ma welin burzhudoù da lezenn.

¹⁹ Diavaeziad on war an douar, na guzh ket da c'hourc'hemennoù ouzhin!

²⁰ Va ene a zo kuzumet er garantez en deus a bep amzer evit da varnedigezhioù.

²¹ Gourdrouz a rez ar re lorc'hus milliget, a bella eus da c'hourc'hemennoù.

²² Lam diwarnon ar vezh hag an dispriz, rak mirout a ran da destenioù.

²³ Ar re c'halloudek zoken a zo azezet hag o deus komzet em enep, met da servijer a breder war da reolennoù.

²⁴ Setu perak da destenioù a zo va flijadur ha va c'huzulierien.

ד Dalet

ד Dalet

²⁵ Va ene a zo staget ouzh ar poultr. Gra din advevañ hervez da gomz!

²⁶ Disklêriet em eus dit va hentoù hag ec'h eus respontet din. Desk din da reolennoù.

²⁷ Ro din da anavezout hent da gemennadurioù, hag e komzin eus da vurzhudoù.

²⁸ Va ene a ouel gant ar glac'har. Va adsav hervez da gomz!

²⁹ Pella diouzhin hent ar gaou, ha ro din ar c'hras da virout da lezenn.

³⁰ Dibabet em eus hent ar wirionez, lakaet em eus da varnedigezhioù dirak va daoulagad,

³¹ staget on ouzh da destenioù, AOTROU, na'm laka ket mezhek!

³² Redek a rin en hent da c'hourc'hemennoù, pa ez po lakaet va c'halon er frankiz.

³³ AOTROU, kelenn din hent da reolennoù, hag e virin anezhañ betek an dibenn.

³⁴ Ro din skiant, hag e virin da lezenn, hag e heuilhin anezhi a-greiz va c'halon.

³⁵ Va laka da gerzhout en hent da c'hourc'hemennoù, rak kavout a ran plijadur enno.

³⁶ Stou va c'halon etrezek da destenioù, ha nann war-zu ar gounid.

³⁷ Distro va daoulagad diouzh gwel an traoù didalvez, va laka da advevañ ez hentoù!

³⁸ Starta da'z servijer da c'her, a zo evit ar re a zouj ac'hanout.

³⁹ Distro diouzhin ar vezh am eus aon anezhi, rak da varnedigezhioù a zo mat.

⁴⁰ Setu, e huanadan war-lerc'h da gemennadurioù. Va laka da advevañ dre da reizhder!

⁴¹ Ra zeuio da vadelezh warnon, AOTROU, ha da silvidigezh hervez da c'her,

⁴² hag em bo peadra da respont d'an hini am zamall, rak e fizian ez komz.

⁴³ Na lam ket a-grenn eus va genoù ar gomz a wirionez, rak ez on en gortoz eus da varnedigezhioù,

⁴⁴ hag e virin da lezenn dalc'hmat ha da viken.

⁴⁵ Kerzhout a rin er frankiz, rak e klaskan da gemennadurioù.

⁴⁶ Komz a rin eus da destenioù dirak ar rouaned, ha ne'm bo ket a vezh.

⁴⁷ Kavout a rin va flijadur ez kourc'hemennoù a garan.

⁴⁸ Sevel a rin va daouarn etrezek da c'hourc'hemennoù a garan, hag en em zalc'hin ouzh da reolennoù.

ז Zayin

ז Zayin

⁴⁹ Az pez soñj eus ar gomz roet da'z servijer, ac'h eus va lakaet da esperout enni.

⁵⁰ Houmañ eo va frealz em foan, ma ro da c'her ar vuhez din.

⁵¹ Ar re lorc'hus am golo a c'hoapaerezh, met ne bellaan ket diouzh da lezenn.

⁵² Soñj am eus eus da varnedigezhioù a wechall, o AOTROU, hag ez on frealzet.

⁵³ An droug a grog ennon a-enep ar re fall a zilez da lezenn.

⁵⁴ Da reolennoù eo abeg va c'hanaouennoù, en ti emaon o chom ennañ evel un diavaeziad.

⁵⁵ En noz em eus soñj eus da anv, o AOTROU, hag e viran da lezenn.

⁵⁶ Hemañ eo va lod, mirout da gemennadurioù.

⁵⁷ Va lod, o AOTROU, e lavaret em eus, eo mirout da gomzoù.

⁵⁸ Da bedet em eus a-greiz va c'halon: Az pez truez ouzhin hervez da bromesa!

⁵⁹ Kontet em eus va hentoù, ha troet va c'hammedoù etrezek da destenioù.

⁶⁰ Hastañ a ran, ne zalean ket, evit mirout da c'hourc'hemennoù.

⁶¹ Stignoù ar re zrouk a oa en-dro din, ne'm eus ket ankounac'haet da lezenn.

⁶² Sevel a ran da hanternoz evit da veuliñ, abalamour da'z parnedigezhioù reizh.

⁶³ Me a zo keneil d'an holl re a zouj ac'hanout, hag a vir da gemennadurioù.

⁶⁴ AOTROU, an douar a zo leun eus da vadelezh. Desk din da reolennoù.

⁶⁵ AOTROU, graet ec'h eus vad da'z servijer, hervez da gomz.

⁶⁶ Desk din kaout furnez ha skiant, rak kredet em eus da c'hourc'hemennoù.

⁶⁷ A-raok bezañ glac'haret, en em gollen, met bremañ e viran da c'her.

⁶⁸ Te a zo mat ha madoberus, desk din da reolennoù.

⁶⁹ Tud lorc'hus o deus ijinet traoù faos em enep. Me a viro da gemennadurioù e kreiz va c'halon.

⁷⁰ O c'halon a zo tevaet evel al lard, me a gav va flijadur ez lezenn.

⁷¹ Mat eo din bezañ bet glac'haret, evit ma teskin da reolennoù.

⁷² Lezenn da c'henoù a zo priziusoc'h din eget milieroù a bezhioù aour hag arc'hant.

⁷³ Da zaouarn o deus va graet ha va stummet. Ro din da vezañ meizek, hag e teskin da c'hourc'hemennoù.

⁷⁴ Ar re a zouj ac'hanout am gwelo hag a drido a levenez, rak ez on en gortoz eus da gomz.

⁷⁵ Gouzout a ran, o AOTROU, n'int da varnedigezhioù nemet reizhder, hag ec'h eus va glac'haret hervez da fealded.

⁷⁶ Ra frealzo da vadelezh ac'hanon, hervez ar ger ac'h eus roet da'z servijer.

⁷⁷ Ra zeuio da druez warnon hag e vevin, rak da lezenn a ra va flijadur.

⁷⁸ Ra vo mezhek ar re lorc'hus a wask ac'hanon hep abeg! Prederiañ a rin war da gemennadurioù.

⁷⁹ Ra zeuio da'm c'havout ar re a zouj ac'hanout, hag ar re a anavez da destenioù.

⁸⁰ Ra vo va c'halon eeun ez reolennoù, evit na vin ket mezhek!

⁸¹ Va ene a bulluc'h war-lerc'h da silvidigezh, en gortoz eus da gomz ez on.

⁸² Va daoulagad a bulluc'h war-lerc'h da c'her, hag e lavaran: Pegoulz e frealzi ac'hanon?

⁸³ Rak evel ur sac'h-lêr ez on er moged, met n'ankounac'haan ket da reolennoù.

⁸⁴ Pegeit e pado deizioù da servijer? Pegoulz e kasi da benn da varnedigezh war ar re a heskin ac'hanon?

⁸⁵ Ar re lorc'hus o deus toullet fozioù evidon, ar pezh n'eo ket hervez da lezenn.

⁸⁶ Da holl c'hourc'hemennoù n'int nemet gwirionez. Heskinet on hep abeg, va sikour!

⁸⁷ War-bouez nebeut hag em distrujent a-ziwar an douar, met ne zilezan ket da gemennadurioù.

⁸⁸ Va laka da advevañ hervez da vadelezh, ha testenioù da c'henoù a virin.

ל Lamed

ל Lamed

⁸⁹ O AOTROU, da gomz a bad da viken en neñvoù.

⁹⁰ Da wirionez a bad a oad da oad. Diazezet ec'h eus an douar, hag e chom start.

⁹¹ Pep tra a bad hiziv hervez da varnedigezhioù, rak an holl draoù a servij ac'hanout.

⁹² Ma ne vije ket da lezenn bet va flijadur, e vijen marvet em glac'har.

⁹³ Biken n'ankounac'hain da gemennadurioù, rak drezo eo ec'h eus roet ar vuhez din.

⁹⁴ Me a zo dit, va savete, rak klasket em eus da gemennadurioù.

⁹⁵ Ar re zrouk o deus va gedet evit va lakaat da vervel, met ouzh da destenioù ez on evezhius.

⁹⁶ Gwelet em eus harzoù da gement a zo peurvat, da c'hourc'hemenn a zo astennet diharz.

⁹⁷ Pegement e karan da lezenn! Komz a ran diwarni a-hed an deiz.

⁹⁸ Va lakaat a rez da vezañ furoc'h eget va enebourien dre da c'hourc'hemennoù, rak bepred emaint ganin.

⁹⁹ Tremenet em eus e furnez e-biou d'an holl re o deus va c'helennet, rak e prederian war da destenioù.

¹⁰⁰ Muioc'h desket on eget ar re gozh, dre ma em eus miret da gemennadurioù.

¹⁰¹ Distroet em eus va c'hammedoù diouzh pep hent fall, evit mirout da gomz.

¹⁰² N'on ket bet distroet diouzh da varnedigezhioù, rak te ec'h eus va desket.

¹⁰³ Pegen dous eo da c'her da'm staon, dousoc'h eget ar mel da'm genoù!

¹⁰⁴ Da gemennadurioù a ro skiant din, setu perak e kasaan pep hent gaouiat.

¹⁰⁵ Da gomz a zo ul lamp da'm zreid, hag ur sklêrijenn war va hent.

¹⁰⁶ Touet em eus hag e talc'hin, mirout da varnedigezhioù reizh.

¹⁰⁷ Gwall c'hlac'haret on, AOTROU, gra din advevañ hervez da gomz!

¹⁰⁸ AOTROU, degemer mat ar gouestloù a ginnig va genoù dit, ha desk din da varnedigezhioù!

¹⁰⁹ Va buhez a zo dalc'hmat en arvar, koulskoude ne'm eus ket ankounac'haet da lezenn.

¹¹⁰ Ar re zrouk o deus stegnet antelloù din, met n'on ket en em bellaet diouzh da gemennadurioù.

¹¹¹ Kemeret em eus da destenioù evel un hêrezh peurbadus, rak ez int levenez va c'halon.

¹¹² Stouet em eus va c'halon da seveniñ da reolennoù, bepred ha betek an diwezh.

ס Samek

ס Samek

¹¹³ Kasaat a ran ar soñjoù didalvez, met karout a ran da lezenn.

¹¹⁴ Va repu ha va skoed ez out, hag ez on en gortoz eus da gomz.

¹¹⁵ Tud drouk, pellait diouzhin, ha me a viro gourc'hemennoù va Doue.

¹¹⁶ Va harp hervez da c'her hag e vevin, ha na'm laka ket da vezañ mezhek em gortoz!

¹¹⁷ Va harp hag e vin salvet, hag e vo atav va daoulagad war da reolennoù!

¹¹⁸ Disteurel a rez kuit ar re a bella diouzh da reolennoù, rak o zouellerezh a zo ur gaou didalvez.

¹¹⁹ Kas a rez da netra evel eon holl re zrouk an douar, setu perak e karan da destenioù.

¹²⁰ Va c'hig a gren gant an aon am eus razout, hag e toujan da varnedigezhioù.

ע Ayin

ע Ayin

¹²¹ Miret em eus ar varnedigezh hag an reizhder, na'm dilez ket da'm gwaskerien.

¹²² Bez diwaller da servijer evit e vad, ra ne wasko ket ar re lorc'hus ac'hanon.

¹²³ Va daoulagad a bulluc'h war-lerc'h da silvidigezh ha ger da reizhder.

¹²⁴ Gra e-keñver da servijer hervez da vadelezh, ha desk din da reolennoù.

¹²⁵ Me eo da servijer, ro din da vezañ meizek, hag ec'h anavezin da destenioù.

¹²⁶ Poent eo d'an AOTROU ober, dilezet o deus da lezenn.

¹²⁷ Setu perak e karan da c'hourc'hemennoù, muioc'h eget an aour, muioc'h zoken eget an aour glan.

¹²⁸ Setu perak e kavan reizh da holl gemennadurioù, hag e kasaan pep hent gaouiat.

¹²⁹ Da destenioù a zo burzhudus, setu perak va ene en deus o miret.

¹³⁰ Diskuliadur da gomzoù a ro sklêrijenn, reiñ a ra skiant d'ar re zinerzh.

¹³¹ Digoret em eus va genoù, hag em eus huanadet, rak c'hoantaet em eus da c'hourc'hemennoù.

¹³² Sell ouzhin ha kemer truez ouzhin, evel ma ec'h eus ar c'hiz d'ober e-keñver ar re a gar da anv.

¹³³ Starta va c'hammedoù ez ker, ha na lez direizhder ebet da ren warnon.

¹³⁴ Va dieub eus gwaskerezh an dud, evit ma virin da gemennadurioù!

¹³⁵ Laka da zremm da lugerniñ war da servijer, ha desk din da reolennoù!

¹³⁶ Stêrioù dour a red eus va daoulagad, dre na virer ket da lezenn.

צ Tsade

צ Tsade

¹³⁷ Te a zo reizh, o AOTROU, hag eeun ez parnedigezhioù.

¹³⁸ Urzhiet ec'h eus da destenioù gant reizhder ha gant ur wirionez bras.

¹³⁹ Devet on gant va gred, dre m'o deus va enebourien ankounac'haet da gomzoù.

¹⁴⁰ Da c'her a zo glan-meurbet, setu perak da servijer e gar.

¹⁴¹ Me a zo bihan ha disprizet, met n'ankounac'haan ket da gemennadurioù.

¹⁴² Da reizhder a zo reizhder da viken, ha da lezenn n'eo nemet gwirionez.

¹⁴³ An estrenvan hag an enkrez o deus va zapet, met da c'hourc'hemennoù eo va flijadur.

¹⁴⁴ Reizhder da destenioù a zo peurbadus, ro din d'o c'hompren evit ma vevin!

¹⁴⁵ Krial a ran a-greiz va c'halon, respont din, AOTROU, hag e virin da reolennoù.

¹⁴⁶ Krial a ran dit, va savete, hag e virin da destenioù.

¹⁴⁷ Diaraogiñ a ran an deiz hag e krian, hag ez on en gortoz eus da gomz.

¹⁴⁸ Va daoulagad a ziaraog ar beilhadennoù, evit prederiañ war da c'her.

¹⁴⁹ Selaou va mouezh hervez da vadelezh. AOTROU, va laka da advevañ hervez da varnedigezh!

¹⁵⁰ Ar re o deus c'hoantoù fall a dosta. En em zerc'hel a reont pell diouzh da lezenn.

¹⁵¹ Te a zo tost, o AOTROU, ha da holl c'hourc'hemennoù eo ar wirionez.

¹⁵² Abaoe pell 'zo ec'h ouzon dre da destenioù, ec'h eus o diazezet evit biken.

ר Resh

ר Resh

¹⁵³ Sell ouzh va glac'har, ha va dieub, rak ne'm eus ket ankounac'haet da lezenn.

¹⁵⁴ Difenn va c'haoz ha va daspren, gra din advevañ hervez da c'her!

¹⁵⁵ Ar silvidigezh a zo pell diouzh ar re zrouk, dre na glaskont ket da reolennoù.

¹⁵⁶ Da druez a zo divent, o AOTROU; gra din advevañ hervez da varnedigezhioù.

¹⁵⁷ Va heskinerien ha va enebourien a zo diniver, met ne zistroan ket diwar da destenioù.

¹⁵⁸ Gwelet em eus ar re disleal hag em eus bet heug outo. Ne viront ket da c'her.

¹⁵⁹ Taol evezh penaos e karan da gemennadurioù, AOTROU, gra din advevañ hervez da vadelezh.

¹⁶⁰ Diazez da gomz eo ar wirionez, ha da varnedigezhioù reizh a zo peurbadus.

ש Shin

ש Shin

¹⁶¹ Ar re vras o deus va heskinet hep abeg, met va c'halon n'he deus ket aon, nemet rak da gomzoù.

¹⁶² Laouenaat a ran gant da ger, evel an hini a gav ur preizh bras.

¹⁶³ Euzh am eus ouzh ar gaou hag e kasaan anezhañ, karout a ran da lezenn.

¹⁶⁴ Da veuliñ a ran seizh gwech an deiz, en abeg da'z parnedigezhioù reizh.

¹⁶⁵ Ur peoc'h bras a zo evit ar re a gar da lezenn, ha netra ne c'hell o diskar.

¹⁶⁶ AOTROU, esperout a ran ez tieubidigezh, hag e ran hervez da c'hourc'hemennoù.

¹⁶⁷ Va ene a vir da destenioù, hag o c'haran gant ur garantez vras.

¹⁶⁸ Mirout a ran da gemennadurioù ha da destenioù, rak va holl hentoù a zo dirazout.

¹⁶⁹ AOTROU, ra zeuio va c'hriadenn dirazout! Ro din da vezañ meizek hervez da gomz.

¹⁷⁰ Ra zeuio va fedenn dirazout! Va dieub hervez da c'her.

¹⁷¹ Va muzelloù a embanno da veuleudi, pa ez po desket din da reolennoù.

¹⁷² Va zeod ne gomzo nemet diwar-benn da c'her, rak da holl c'hourc'hemennoù a zo reizh.

¹⁷³ Ra vo da zorn ur sikour din! Rak dibabet em eus da gemennadurioù.

¹⁷⁴ AOTROU, huanadiñ a ran war-lerc'h da silvidigezh, da lezenn a zo va flijadur.

¹⁷⁵ Ra vevo va ene evit da veuliñ, ha ra zeuio da varnedigezhioù war va sikour!

¹⁷⁶ Dianket on evel un dañvad kollet: klask da servijer, rak ne'm eus ket ankounac'haet da c'hourc'hemennoù.