Salmoù 118 - Bibl Koad 21: Ar Bibl e Brezhoneg evit ar Vretoned

Salm 118

¹ Meulit an AOTROU rak mat eo, rak e drugarez a bad da viken.

² Ra lavaro Israel ivez e pad e drugarez da viken.

³ Ra lavaro tiegezh Aaron e pad e drugarez da viken.

⁴ Ra lavaro ar re a zouj an AOTROU e pad e drugarez da viken.

⁵ Eus kreiz an estrenvan em eus galvet an AOTROU, hag an AOTROU en deus va selaouet ha va lakaet er frankiz.

⁶ An AOTROU a zo evidon, ne'm bo aon rak netra. Petra a raio an den din?

⁷ An AOTROU a zo evidon e-touez ar re am sikour, hag e sellin hep aon ouzh ar re am c'hasa.

⁸ Gwelloc'h eo en em dennañ war-zu an AOTROU eget fiziout en den.

⁹ Gwelloc'h eo en em dennañ war-zu an AOTROU eget fiziout er re vras.

¹⁰ An holl vroadoù o doa va enkelc'hiet, met en anv an AOTROU em eus o lakaet a-dammoù.

¹¹ Va enkelc'hiet o doa, ya, va enkelc'hiet o doa, met en anv an AOTROU em eus o lakaet a-dammoù.

¹² Va enkelc'hiet o doa evel ar gwenan, mouget int bet evel un tan drein, rak en anv an AOTROU em eus o lakaet a-dammoù.

¹³ Va bountet ez poa start da gouezhañ, met an AOTROU en deus va sikouret.

¹⁴ An AOTROU eo va nerzh ha va c'han, bet eo va dieuber.

¹⁵ Ur vouezh eus kanoù a drec'h a sav e teltennoù ar re reizh: Tu dehou an AOTROU a zo galloudus!

¹⁶ Tu dehou an AOTROU a zo uhel bras, tu dehou an AOTROU a zo galloudus!

¹⁷ Ne varvin ket met bevañ a rin, hag e tisklêrin oberennoù an AOTROU.

¹⁸ An AOTROU en deus va c'hastizet rust, met n'en deus ket va roet d'ar marv.

¹⁹ Digorit din dorioù ar reizhder, mont a rin ennoc'h hag e veulin an AOTROU.

²⁰ Amañ emañ dor an AOTROU, ar re reizh a yelo enni.

²¹ Me az meulo rak selaouet ec'h eus ac'hanon, hag out bet va dieuber.

²² Ar maen taolet kuit gant ar re a vañsone a zo deuet da vezañ penn ar c'horn.

²³ Kement-se a zo bet graet gant an AOTROU, ur burzhud d'hon daoulagad.

²⁴ Hemañ eo an deiz en deus graet an AOTROU, tridomp ha laouenaomp ennañ!

²⁵ O AOTROU, ro ar silvidigezh! O AOTROU, ro ar fonnusted!

²⁶ Benniget ra vo an hini a zeu en anv an AOTROU! Ho pennigañ a reomp eus ti an AOTROU.

²⁷ An AOTROU eo Doue hag en deus hor sklêrijennet. Liammit gant kerdin loen an aberzh, degasit anezhañ betek kerniel an aoter.

²⁸ Te eo va Doue, me az meulo. Va Doue, da uhelaat a rin.

²⁹ Meulit an AOTROU rak mat eo, rak e drugarez a bad da viken.