Salmoù 112 - Bibl Koad 21: Ar Bibl e Brezhoneg evit ar Vretoned

Salm 112

¹ Meulit an AOTROU! Eürus an den a zouj an AOTROU, hag a gav e blijadur en e c'hourc'hemennoù!

² E lignez a vo galloudus war an douar, gouenn an dud eeun a vo benniget.

³ Ar fonnusted hag ar binvidigezh a vo en e di, hag e reizhder a bad da viken.

⁴ Ar sklêrijenn a sav en deñvalijenn evit an den eeun; truezus eo, trugarezus ha reizh.

⁵ Eürus an den a zo truezus hag a brest, seven a ra e oberoù hervez ar reizhder!

⁶ Ne vo biken brañsellet, eñvor an den reizh a vo peurbadus.

⁷ N'en deus ket aon rak ar c'heloù fall, e galon a zo start, o fiziout en AOTROU.

⁸ E galon, harpet mat, n'he devo ket aon, betek ma en devo diskuizhet e sell war e enebourien.

⁹ Skuilhet en deus, roet en deus d'ar beorien, e reizhder a bad da viken hag e benn a sav gant gloar.

¹⁰ An den drouk a wel anezhañ hag en deus desped, hag e c'hrigoñs e zent hag e tisec'h. C'hoant ar re zrouk a yelo da get.