Salmoù 109 - Bibl Koad 21: Ar Bibl e Brezhoneg evit ar Vretoned

Salm 109

¹ D'ar mestr-kaner; salm David.

² O Doue va meuleudi, na dav ket! Rak genoù an den drouk ha genoù an den fall a zo digoret a-enep din. Komz a reont din gant un teod gaouiat.

³ Va c'helc'hiañ a reont gant komzoù a gasoni, hag e reont din ar brezel hep abeg.

⁴ Tra ma karan, en em reont va enebourien, ha me ne ran nemet pediñ.

⁵ Rentet o deus din an droug evit ar mad, hag ar gasoni evit ar garantez.

⁶ Laka warnañ un den drouk, ha ma en em zalc'ho un heskiner en e du dehou!

⁷ Pa vo barnet, ma vo disklêriet kablus, ha ma vo kontet dezhañ e bedenn evel pec'hed!

⁸ Ra vo berraet dezhañ niver e zeizioù, ra gemero unan all e garg!

⁹ Ra vo e vibien minored, hag e wreg intañvez!

¹⁰ Ra vo e vibien kantreerien ha paour, ra vo ret dezho mont da glask bara pell eus o mogerioù!

¹¹ Ra daolo ar c'hredour ar roued war ar pezh en deus, ra breizho diavaezidi e labour!

¹² Ra ne vo den da virout outañ e vadelezh, ra n'en devo den truez ouzh e vinored!

¹³ Ra vo e lignez lamet kuit, ra steuzio e anv gant ar rummad da zont!

¹⁴ Ra zeuio da soñj d'an AOTROU direizhder e dadoù, ra ne vo ket kaset kuit pec'hed e vamm,

¹⁵ ra vint atav dirak an AOTROU, ra vo o eñvor lamet kuit eus an douar,

¹⁶ rak n'en deus ket bet soñj d'ober gant madelezh, rak en deus heskinet an hini glac'haret ha paour hag an den a galon rannet, evit e lakaat da vervel!

¹⁷ Karet en deus ar vallozh, dont a raio warnañ. N'en deus ket kavet plijadur er vennozh, pellaat a raio dioutañ.

¹⁸ Goloet e vo a vallozh evel gant ur vantell, mont a raio en e gorf evel dour hag en e eskern evel eoul,

¹⁹ bez' e vo evel ur gwiskamant ouzh e bakañ, evel ur gouriz atav ouzh e c'hourizañ.

²⁰ Evel-se e vo, eus perzh an AOTROU, gopr va heskinerien, hag ar re a lavar droug a-enep din.

²¹ Met te, AOTROU va Doue, gra em c'heñver abalamour da'z anv, hervez braster da vadelezh, va dieub,

²² rak me 'zo glac'haret ha paour, ha va c'halon a zo rannet em diabarzh.

²³ Mont a ran evel ar skeud pa gouezh, kaset on kuit evel ar c'hilheien-raden.

²⁴ Va daoulin a vrañsell gant ar yun, va c'hig en deus kollet e lard.

²⁵ Me a zo evito un abeg a zismegañs; o welout ac'hanon, e hejont o fenn.

²⁶ Bez va sikour, AOTROU va Doue! Va savete hervez da vadelezh,

²⁷ evit ma ouezint ez eo da zorn, ez eo te, AOTROU, en deus graet kement-se.

²⁸ Milligañ a raint, te a vennigo. Sevel a reont, met int a ruzio ha da servijer a laouenaio.

²⁹ Ra vo va enebourien gwisket a zismegañs, ha goloet gant o mezh evel gant ur vantell!

³⁰ Va genoù a veulo uhel an AOTROU, e uhelaat a rin e-kreiz ar vodadeg,

³¹ rak en em zerc'hel a ra en tu dehou d'an ezhommeg, evit e saveteiñ eus ar re a gondaon e ene.