Salmoù 108 - Bibl Koad 21: Ar Bibl e Brezhoneg evit ar Vretoned

Salm 108

¹ Kanaouenn; salm David.

² Va c'halon a zo prest, o Doue! Me a gano, me a veulo, va gloar eo.

³ Dihunit, va lud ha va zelenn! Me a ziaraogin ar gouloù-deiz.

⁴ Da veuliñ a rin e-touez ar pobloù, o AOTROU, da ganañ e-touez ar broadoù,

⁵ rak da vadelezh a sav dreist an neñvoù, ha da wirionez betek ar c'hoabr.

⁶ O Doue! Sav war an neñvoù. Ra vo da c'hloar war an douar holl,

⁷ abalamour da'z re garet-mat da vezañ dieubet. Va savete gant da du dehou ha va selaou!

⁸ Doue en deus komzet en e santual, me a laouenaio. Lodennañ a rin Sichem, muzuliañ a rin traonienn Sukkod,

⁹ Galaad a zo din, din eo Manase, Efraim eo moger va fenn, Juda eo va lezenner,

¹⁰ Moab eo ar gibell en em walc'han enni, teurel a ran va botez war Edom, leuskel a ran kriadennoù a levenez war vro ar Filistined!

¹¹ Piv am blenio etrezek ar gêr greñv? Piv am c'haso betek Edom?

¹² Ha n'eo ket te, o Doue, hag ac'h eus hon taolet kuit, te ha ned ae ken er-maez, o Doue, gant hon armeoù?

¹³ Ro deomp sikour evit tec'hout diouzh an estrenvan, rak skoazell an den n'eo nemet moged.

¹⁴ E Doue e vrezelimp gant nerzh, hag eñ eo a vac'ho hon enebourien.